Sjukebal Sk’oplal

Yich’ stsaik spisil

Jukeb sjukwinik Mantalil. Te j-a’tel jtuneletik yu’un te muk’ul j-a’tel jtunel ta Mejiko, ta jujun lumetik, ta Muk’ul lum Mejiko sok ta jujun jteklum, te bitik ay yu’une sok snail a’teliletik, jich bit’il snail j-a’tel jtuneletik ta jujun lumetik sok ta jujun jteklum, snail jpas lekil mantaliletik, snail ta xchajpalchajp a’teliletik te swentainej sba stukelike, sok mach’auk te ya spas ya’tel ta stojol te jnaklejetik ta komone, yame yich’ik tojel ta tak’in te ya’tel yakal ta spasele, biluk a’telil, wentainwanej mak tikunel abatinel, ja’me jich yipal ya yich’ tojel te binti yipal ya x-a’teje.

Te tojolil ta tak’ine yame yich’ ts’akajtesel ta jujun ja’wil sok ja’me jich ya yich’ tojel te bit’il chajpanbil sk’oplal te jich yipal te tojolil ya yich’ tojel te j-a’teletike, jich bit’il:

I. Ja’me tojel ta tak’in mak majtantesel ta tak’in spisil te bin ya yich’ ak’ele mak majtantesel ta biluk, jich bit’il tojel mak majtantesel, majtantesel ta jujun ja’wil, sk’anel wokol tojel ta tak’in, slajinel o’tanil ta majtantesel sok ayiktoxan yantik-a, mame tsakbiluk stukel tey-a te biluk koltayelil ya yich’ ak’el te ya yich’ cholbeyel sk’oplal te batik la yich’ lajinel te tak’in ta swenta spasel te biluk a’telile sok teme ay ya xlaj tak’in ta swenta kuchojibal ta spasel te biluk a’telile.

II. Mame jtuluk j-a’tel jtunel ya stak’ ya yich’ tojel mak majtantesel ta tak’in, jich bit’il ya x-alot ta sjachibal mantalil, ta skaj spasel biluk a’telil, wentainwanej mak tikunel abatinel, teme ja’ toyem-a te bit’il ya yich’ tojel te Muk’ul J-a’tel Jtunel ta Mejiko ta swenta te bin ut’il chajpanbil te tojolile.

III. Mame jtuluk j-a’tel jtunel ja’ bayel ya yich’ tojel mak pajal ya yich’ majtantesel ta tak’in sok te mach’a toyem ya’tele; ja’nax teme bayel smakoj biluk a’telil te banti ya yich’ tojel te j-a’tel jtunele, sok teme jich tojolil ta a’tel-a te jich yipal ya yich’ ak’beyel te j-a’tel jtunel ta skaj sp’ijil sok lekil a’telil te binti ya spase mak ta skaj lek te a’telil ya yich’ pasel meltsanele, ta spisil yame yich’ yomel tusel te jich yipal te tojel majtantesel ta tak’ine mame stak’ ya xk’ax ta olil te tojel ta tak’in te bit’il ch’akbil stojol te Muk’ul J-a’tel Jtunel ta Mejiko te bit’il chajpanbil sk’oplale.

IV. Mame ba ya yich’ ak’beyel skux yo’tanik, majtantesel ta tak’in, ma’yuk tojel lok’el ta tak’in ta swenta te a’telil ya spasik te j-a’tel jtuneletike, jich bit’il smajanel tak’in te k’unk’un ya stojik baele, melel ma jichuk tsakal ta sjunil te mantalil ta swenta chajpanbil k’op yu’un te jpas mantaliletike, chajpanbil sk’oplal ta komon mak ta sk’op ya’yejal ta spisil ta swenta te a’telile. Ja’ into te ya’yejale mame tsakbiluk tey-a ini te majtantesel ta tak’ine. Ja’naxme jich ya xjil ta swenta te bitik koltayelil ya yich’ ak’el ta swenta te j-a’tel jtuneletik ta skaj te jich ay te ya’telike.

V. Te tojel majtantesel ta tak’ine sok te sjunil bin tsakajtik te tojolile yame yich’ ak’el ta ilel ta komon, yame yich’ albeyel sk’oplal sok yak’el ta ilel ta spisil te jich yipal ch’akbil te tojolile, jich bit’il tojel ta p’ejel tak’in sok majtantesel ta biluk.

VI. Te Snail Muk’ul Tsobleje, te snail j-a’tel jtuneletik ta jujun lumetik sok te muk’ul tsoblej yu’un te Muk’ul lum mejiko, ja’me ay ta swentaik spasel, yame spukbeik sk’oplal te sjunil mantaliletike yu’unme jich ya yich’ ch’unel-a te bitik yich’oj te ini xajt’mantale sok te sk’op ya’yejal chajpanbil ta swenta into yu’unme jich ya yich’ ak’el ta tojel mulil ta swenta teme maba ya yich’ ch’unel mak sk’axumtayel te mantalil jun chajpanbil li’ ta sjunil te Muk’ul mantalile.