Tiitulo Ucha

Cha cahan na cua tiso tiñu cuenda ndihi chi

Artiiculo 127. Ndihi ra satiñu cuenda cha ndaca ñahan tichi Ñuhun Ñucohyo, tichi ndihi Ñuhun, tichi Ñuun Ñucohyo, tacan ni tichi ndihi Municipiu, chi tichi cuhva cha satiñu chi. Tacan ni tichi ndihi cha iyo cuenda cha satiñu cuenda Ñuhun chi cuenda municipiu chi cuenda fideicomiso cha satiñu cuenda ñuun, tacan ni ndihi cha satiñu maan cuenda chi, chi ndihi ca cha satiñu cuenda ñuun, cua tiahvi tiñu yahvi ñivi ta ña cua nducuee cua nihin ñi yahvi ñi cha satiñu ñi ican, a ndiso tiñu ñi, a ndehe ñi tiñu ican, cua tiahvi tiñu chi ñi cuhva cha tahan chi cuenda tiñu savaha ñi.

Ta cha cuenda cha quihin yahvi ñivi satiñu, iin iin cuiya cua cuitacuati chi iin cha inuun nu tutu cahan yoso xuhun chatiñu cuenda chi, cua coo chi cuhva cha cahan tiñu ihya:

I. Cha cuu yahvi ñivi a cha tiahvi tiñu chihin ñi chi xuhun a ñaan ndatiñu iyo, a cuenda cha chachi ñi, a xuhun cha chaha tiñu chihin ñi cha xini cuiya, a cha samani tiñu chihin ñi, a ñaan iin cha sacanaan ñi, a tutu cuenda cha cua sata ñi, a cuenda iin tiñu savaha ñi a ñaan inca cha cuu chi, ta ihya ña quihvi cuenda cha sanaan ñivi xuhun ta iyo tutu cuenda chi cha satiñu tiñu can, ta ndihi cuhva cha cua cuahnu tiñu can, ta sanaan ñivi xuhun cuenda cha satiñu ñi cuenda cha ndacañahan can.

II. Ni iin ñivi satiñu cuenda ñuun ña cua cuu quihin yahvi ñi, cuhva cha cahan fraccioon iti chata ihya, cuenda cha satiñu ñi, a ndehe ñi nu cuu tiñu, a cuenda cha savaha ñi inca tiñu, ta siqui ca cua coo yahvi ñi ta ñavi ca maan ra cuu Xini ndacañahan ñuhun Ñucohyo ta iyo chi nu tutu cuenda cha chatiñu xuhun cuhva cha tahan chi.

III. Ni iin ñivi satiñu cuenda ñuun ña cua cuu quihi yahvi ñi cha sucu ca ta ñavi ñivi cuu xini chihin ñi nu satiñu ñi, ndicha cuii ti tu cha cuaha tiñu ndiso ñi cuenda ñuun, a cuaha yahvi ñi ti cuhva cha tahan chi cha ndehe ñi tiñu cuu chi, vati savaha ñi iin tiñu cha ica xaan cuhva cha sacuaha vaha ñi, ta ndihi cuhva cha cua sacanaan ñi ña cua yaha iin sava cua cuu chi, cuhva cha iyo tiñu cha sacanaan maan ra cuu Xini ndacañahan ñuhun Ñucohyo, ta iyo chi nu tutu cuenda cha chatiñu xuhun cuhva cha tahan chi.

IV. Ña cua tiahvi tiñu chi ñivi cha cha queta tiempu satiñu ñi, a cha cua sacanaan ñi xuhun cha quee ñi cha satiñu ñi, a cua tiahvi tiñu chihin ñi cha ni savaha ñi iin tiñu, a cua cuhva nuun tiñu xuhun chihin ñi, tu cha ña cahan ley cuenda chi, a tiñu chaha ra sacuaha ta tisovaha ley, a nu tutu chinu cuenda cha satiñu ñivi iin cahnu ni, a ñaan inca cha cahan chi cuenda ndihi ni tiñu. Ña cua cahan tiñu cuenda chacan nu cua tiahvi tiñu chi ñivi. Ta ña cua quihvi cuenda cha cua cumi tiñu chi ñivi satiñu cuenda ñuun, cha ndiso tiñu ñi.

V. Cuhva cha cua tiahvi tiñu chi ñivi, cua coo tutu cha cua cuhva cuenda chi ñivi ñuun, ta cua sanducachi chi ndihi cuhva iyo cha ña tiin tiñu, ta cuhva cha nandaa ta nanuun xuhun cha iyo a ndatiñu cuu chi.

VI. Ra sacuaha ta tisovaha ley ta nduinuun ra ta ra Vehe nu satiñu ra, ta ra ndiso tiñu iin ni cuhva tichi iin iin Ñuhun, a ra sacuaha ta tisovaha ley Vehe nu nducuiti ra ta ra tichi ñuun Ñucohyo, cuhva cha iyo ndatu chi iin iin cuenda ra ta ra, cua savaha ra ta ley cha cua savaha cha cua cuinu tiñu cuhva cha cahan artiiculo ihya, ta ndihi cuhva cha cahan ley cahnu ya cuenda chacan, vati cua tachituni chi chi ñivi cha ña cua sacuinu, a sacatu ni ñi cha savaha ñi cuhva cha cati ley ya ta ña ndicha.