Chikuasen Tlaijtolnechikoli

Tekilistli Uan Tekitlamokuitlauili

Chikuasempoali uan eyitipaj tlaijtoli. Nochi maseuali kipiajixkayotl pan kuali tekilistli uan katli kimonekilia; pan yani, motemos tekilistli uan nechikol tekilistli, tlen tlajtoua machiotlajtoli.

Ni machiotinin mexkosenkotili, tlen amo kiixpanos ni tlatsinkuili, temakas machiotlajtolmen tlen pan tekilistli, uan kiani kichiuasej:

A. Tlen tekipanouanij, miltekitinin, kaltijtik tekipanouanin,tekimaitl chiualistli uan tlen nochi tlaneuil amatekilistli:

I. Nochij tekitl kipia tetias chikueyi kauitl.

II. Katli tekipanouaj tlayoua kipia tetias chikome kauitl.

III. Amo uelis mochiuas: kampa amo onka tlamokuitlauili uan mauililo,tlayoualtekitilikaltlamantli tekichiualistli uan nochi tekitl teipa majtlaktli kauitl tlen tlayoua ka konemej katli ayamo kitsontiaj majtlaktli uan chikuasen xiuitl;

Mokaua mauilili kintekiuisej konemej katli kipiaj majtlaktli uan naui xiuitl.Katli kitsontikeja majtlaktli uan naui xiuitl uan katli ayano kitsontia kaxtloli uan se xiuitl kinamiki tekipanosej chikuasej kauitl;

IV. Tlan tekipanoua chikuasej tonali, kipia mosiajketsasse tonal;

V. Siuamej kemajtlanemiltiaj amo kichiuasej tekitl katli etik uan kitosneki mauililo pan ichikaualis tlen itlanemilkayotl; Kipia mosiajketsas chikuasen xamano tlen achitiui kema nexkaya tlakatis ikone uan chikuasej xamano teipa kemaj ya tlakatki ikone, uankiselis tlen asitok itlaxtlauil uan amo kipolos iteki uan sekinok xitlaualismen katli kipixki ka iteki. Kema tlachiichitiakipias ome tekisiajketsali pan se tonal tlen tlatlajko kauitl tlen sesenka pampa kitlamakas ikone;

VI. Len tlaxtlauili katli kipiasej tekipanouanin elistlen nochi tekipanouanin uan katli kipiaj tekitlaixnamikili.Tlen achtiuimen monenemiltisej tlalxexelolpa katli momakas; uan tlen ome mochiuas san katli ueli kichiuas tekilistli uan tlen katli monekilia.

Nochi tlaxtlauili katli kipiasej tekipanouanin moneki kuali kiaxilis ka motlakouis tlen kitekiuia ken se uikayotl, kalchiuali, pakilisnechikoli, tlamatili, uan ka uelis kinmakas tlamachtili ka chiualtili ikoneuan. Tlaxtlauili katli kipiasej tlayekolismen momakas, nojkia tlen nochi tekitlaxtlauil chiualmen.

Nochi tlaxtlauili katli kipiasej tekipanouanin momakas ka se mexko nechikol tlatitlanili ka itlaixpantil tekipanouanin, tlen tlanauatijkemen uan ueyi tlanauatijketl, katli ueli kinpaleuis tekitlatitlanili tlen katli moneki uan kuali kichiuasej ininteki.

VII. Nochi sepa tekilistli moneki kipias san se tlaxtlauili,uan moipanitas tlen siuatl uan tlakatl uan kanke ejketl;

VIII. Nochi tlaxtlauili amo kin kixtilisej yon se kentsi;

IX. Nochi tekipanouanin kipiasej ixkayotl kiselisej itlatlantlenkaltekichiualistli, tlen tlajtoua ni tlanauatili:

a) Se mexko nechikol tlatitlanili, mokualtilia ika tekipanouanin, tlanauatianin uan ka ueyi tlanauatijketl, kijtosej kenijki kinmakase inintlatlan tekipanouani;

b) Mexko nechikol tlatitlanili kichiuas temolistli uan kichiuas nemachtili katli moneki uan uelis kiximatis kenijkatsa eltok mexko tomin tlaxtlauili. Kitlachilis yampatsa kenijki uelis kiueiltias mexko kaltekichiualistli, kenijki kiselis itlatlan uan kenijki kimiakilis tomin.

c) Nechikol tlatitlanili uelis kitlachilis katlikinamiki itlatlan kema onkas yankuik nemachtili uan temolistli katli moneki;

d) Machiotlajtoli kijtos kema amo temakasej tomi itlatlan yankuik kaltekichiualistli ika se keski xiuitl, pan nochi tekitlatemolistli uan sekinok tekimen tlen mouikas;

e) Tlen momatis kenijki momakas tomin itlaltlan tlen sesenka kaltekichiualistli motlachilis ka tlatsinkuili kenijki kikixtilia tomin tlen tlajtoua machiotlajtoli tekitomin tlaxtlauili. Tekipanouanin uelis kichiuasej amatlajkuiloli pan kaltomin tlaxtlajkayotl katli amo kinpaktia, kichiuasej tlen tlajtoua tekpanali tlanauatili;

f) Ixkayomen tlen tekipanouanin katli kin makase tomin itlaltlan, amo kitosneki uelis no kinenemiltise amatekilistli tlen kaltekichiualistli.

X. Ni tomin tekipanolistli moneki moixtlauas ka tomin katli motekiuia, uan amo uelis motlaxtlauas ka se tlenijki tlakoali, amatlakoali, uan sekinok ipatlaka tomin tlaxtlauili.

XI. Kemaj monekis tekipanosej kueilise kauitl tekilistli, momakas ompa tlaxtlauili tlen kampa pano kauitl katli kimelaua. Amo uelis panos eyi kauitl pan se tonal tekilistli, uan amo uelis panos tlen eyi tonali. Katli ayamo kitsontia kaxtoli uan se xiuitl amo uelis kinselisej pan ni tekitl.

XII. Nochi miltekichiuali, kaltekichiualistli, tekiostochiualistli uansekinok tekitl, mochiualtis tlen tlajtoua machiotlajtoli katli kimelaua kinmakas inintekipanouanin kali kampa mosiaketsasej. Ni tlachiualtili momakas ka itlaxtlauil katli temakan kaltekichiualistli pan se mexko tomin ajokuili tlen uelis kitekiuisej itekipanouanin kiani uelis kintlaneltisej tomin uan uelis mokouisej ininchaj.

Momachilia nochi kiselise tlapaleuiliika se machiotlajtoli uan mochiuas se nechikoli kampa itstose mexko tlayakananin, tlen tekipanouanin uan tlanauatianin, ma kiamatekipanokan mexko tomin ajokuili tlen kalmen. Ni machiojtlajtoli kijtos tlake tekpanali mochiuas uan tekipanouanin elis inin iaxka se kali.

Sentik kamanalmej tlen tlajtoua achtiui se pamitl tlen se pilijtoli, tlen eltoke uejka kajkala kipia tlachiualtili kichiuasej kaltlamachtiloyalmen, kaltepajtikemen uan sekinok tlapaleuili tlen moneki pan teyoualpa.

Nojkia pan nopa tekipanolistli kema pano majtlakpouali itstinin, kikauasej se tlalkakiuili, tlen kiaxilis majtlaktli uan ome tsontli uan majtlakpoali tlaltamachiuali (m2), kampa motlalis tlanemakilsentika, ueyi tekikalmej kitlalisej kampa itstosej miyayotl tekichiuanin uankampa mosiaketsasej.

Mauilili eltos pan se kaltekipanoli, kampa kinemakase chichika tlailistli uan kaltomin ajauiltili;

XIII. Kaltekichiualismen tlen ueli iteki, mochiualtisej kinmakasej inin tekipanojkauan nechikol nemachtili tlen kenijki kichiuasej inin teki. Machiotlajtoli tlanauatis kenijki mochiuas tekpanali uan ka tlake tekipanosej uan tlanauatianin kichiuasej ka ni tlachiualtili.

XIV. Kaltekitlayakananin yajuantin mokauas inin mako tlan se itekipanojka mokokos uan tlan kipias se tekitlanauili tlayekolistli,tlen panos kema kichijtok pan iteki; uajka tlanauatijketl kipia tlaxtlauas katli kimelaua, tlan mijki uan tlan amo uelis tekipanos se keski tonali uan tlen nochi inemilis, tlen tlajtoa machiotlajtolmen. Ni tlachiualtili kipias tlayakanketl maske ya amo kitlanejki nopa tekipanojketl.

XV. Kaltekitlayakanketl kipias chiualtili kitlachilis tlen katli kichiuaj, machiotlajtolmen tlen tlajtoua tlaxpampa uan tlamokuitlauili kampa kaltekipanoua uan kichiuas katli moneki tlamokuitlauili tlen amo onkas tlanauili kema kitekiuia tepostekichiualistli, tlatekiuili uan tlamantli katli motekiuia, nojkia kitase makuali eltok ichikaualis uan inemilis tekipanouanin uan kema siuamen tlanemiltiaj. Machiotlajtolmen tlanauatis kenijki kin tlayauiltisej kema amo moipanitas;

XVI. Tlen tekipanouanin uan kaltekitlayakananin kipiase ixkayotl mosentik paleuisej kema se kamanali kin tlanauia, kipiasej nechikolistli katli kin manauis, nechikol tlamatilistli uan sekinok;

XVII. Machiotlajtolmen kiximatis ixkayotl tlen tekipanouanin uan kalteki tlayakakanin, tekikauali uan tekiketsali;

XVIII. Tekikauali elis xitlauak kema momakas san se tlapaleuili pan tekichiuali, yolpakilis onkas pan axkayotl tlen tekitl uan tlaxtlauil tomin. Pan miyayotl chiuali elis ka tlachiualtili temachiltise tekipanouanin ka achtiui majtlaktli tonali, pan nechikol kuesol tlasenkajketl, tlen kema eltok tonali kema motekiketsasej. Tekikaualmen amo elis xitlauak kematekipanouanin kichiuaj tlanauili ika itstinin uan teaxkamen uan tlan onkas yaoyotl, tlen iaxka mexkotlanauatijketl;

XIX. Tekiketsalmen elis xitlauak san kema katli mochiua uan moneki ma moketsa tekitl tlen kipias ipati katli tlaeliltia, tlen achtiui itlachialis nechikol kuesol tlasenkajketl;

XX. Tlan onkas kuesoli tlen tekipanouanin uan tekikal tlayakananin, mokualtlalis tlen kijtos nechikol kuesol tlasenkajketl ika ixpantili san se tlapoali tekipanouanin, tekikal tlayakananin uan se mexkotlayakanketl;

XXI. Tlan tekikal tlayakanketl amo kineki kisenkauas kuesoli uan amo ki ipanitas tlen tlajtos nechikol kuesoltlasenkajketl tlakuaualpetonili, motlamiltis tekitekiyotl uan mochiualtis kitlaxtlauis tekipanojketl ika itlaxtlauail ipatijka eyi metstli, uan nojkia tlanauili tlen kiselis. Ni tlajtoli amo mochiuas kema mouikas tlateluili tlen tlajtoua katli motokilia pilijtoli. Tlan tekipanouanin amo kiseliaj senkauali, uajka tlamis tekilistli;

XXII. Tlan kaltekitlayakanketl kikixtilis iteki se tekipanojketl tlen amo moneki uan kema kalajki pan se nechikoli tlamanauilkayotl, uan tlan nojkia kalajki pan se tekikauali xitlauak mochiualtis tlen kijtos tekipanojketl, ya kijtos tlan tekipanos uan tlan san kitlaxtlauis tlen ipatijka eyi metstli tekipanoli. Machiotlajtoli kijtos kema kaltekitlayakanketl amo kichiuas tlen tlajtlani tekipanojketl tlan tekipanos ika tlaxtlauili katli kimakas. Nojkia kipias chiualtili kitlaxtlauis tekipanojketl tlen ipatijka eyi metstli itlaxtlauil, kema kisas pan iteki pampa tekikaltlayakanketl kiixpanok pan itlakayo, itlauikal, tatauan, ikoneuan uan ikniuan.

Kaltekitlayakanketl amo uelis kisas tlen ni tlanauali, kema tlaixpanoli uala pan iuilkaljuan ika itlamatilis tekitlayakanketl;

XXIII. Tomintlaneltili katli kiselia tekipanouanin tlen kitlani tlen se xiuitl uan ka tlanauiltlaxtlauili, moixtlauas nimaya kema poliuis kaltekipanolistli;

XXIV. Katli tlauikaj tekipanouanin pampa kitlanejti tekikaltlayakanketl, tekipanojketl yaya tlaxtlauas uan amo uelis kin inamasej inin uikaljuan uan amo kichiualtisej ma tlachtlaua tlen kitlani tekipanojketl tlen se metstli;

XXV. Kema kintekitemouaj amo tlaxtlauasej tekipanouanin kema mochiuas pan teyoualtlatilankemen, uan ka sekinok teaxtekikalmen.

Kema temaka ni tlapaleuili moneki motlachilis katli tlajtlani tekitl uan ka san se tlaselistli, kinmakasej katli nelnelia kinmonekilia nopa tekitl ka mopaleuis ka iuikaljua;

XXVI. Nochi tekitl katli mochiua tlen se mexkoejketl tekipanojketl uan se analiejketl tekitlayakanketl, moneki kisenkauas ka machiotlajtoli katli kimelaua uan kipias amapanojketl tlen altepetl kampa yas tekipanojketl, pan nopa amapanotili nestos ijkuilijtos kema mokuepas tlaxtlauas katli kitekiui;

XXVII. Amo momakas uan amo kinchiualtisej tlen tekipanojketl uan tekitlayakanketl, maske tlajtoua pan machiotlajtoli:

a) Kema kin tlayauiltiaj ka miak tekitl,pampa kiampa kimonekilia.

b) Kema kin tlaxtlauia tlauel kentsi tlan kiampa kijtoua nechikol kuesoltlasenkajketl.

c) Katlikijtoua amo kintlaxtlauis kema tsontik uan panok se xamano.

d) Kampa kijtosej onkas se tekisiajketsali, tlakoalchiuali, ouaatl, chichik tlaili, uan kalnemakilistli kampa kintlaxtlauisej tekipanouanin, kema amo nopaya tekipanoua katli kinmelaua.

e) Kema kinchiualtiaj tlakoasej pan se kalnemakilistli.

f) Kema amo kiselia itlaxtlauil pampa onka tlanauili.

g) Kema kijtoua amo kiselis tlanauil tlaxtlauili se tekipanojketl pampa mokoko pan iteki, uan tekitlanauili tlayekolistli, kema amo mochijki tlen tlajtoua sentikatekichiuali uan kema ki teki kixtilijke.

h) Uan nochi ixkayotl katli kinpaleuia uan kinmanaui tekipanouanin tlen tlajtoua machiotlajtolmen.

XXVIII. Machiotlajtolmen kijtose tlakeya tlatekiuili iniaxka uikalmen, amo uelis kinkixtilisej uan uelis momakas ka amatemakilistli tlen tlajtos machiotlajtoli;

XXIX. Miyayotl xitlaualistli,uan paya kipixtos kema ajkineki ayakmo uelis tekipanos, pampa ueuentsij, nemilistli, kema kinkixtiaj pan iteki, ka kokolistli uan kema se mokokos, kampa konetlamokuitlauiaj, uan sekinok tlapaleuilistli katli kinmonekilia tekipanouanij, miltekitinij, katli san panonitekitinij uan amo kiselia tlaxtlauili, uan sekinok nechikolismej ka iuikaluaj.

XXX. Nojkia onkas tlapaleuili, pan nechikol tekipanouanij katli kichiuase kalmej amo patio uan kuali tlachijchiuali, uan tekipanouanij uelis kikixtise se kali tlen elis iaxka; uan.

XXXI. Ni machiotlajtoli kimelaua kichiuase ma moipanita nochi tekitinij pan tlaltokayolmej, kampakinmelaua kichiuase, uan yani uelis kisenkauasejaxkayotl mexkotekitinijtlanauatijkemej:

a) Maxaual teposchijkemej uan tlatekiuili:

1. Tepostlatsomalistli.

2. Kaltlilmekachiualistli.

3. Ixmekakopinalistli.

4. Ulikalchiualistli.

5. Kalchiualtsopelikayotl.

6. Tekiostotlchiualistli.

7. Tetlakixtili uan tepostlachiualistli, uan kiaxilia sekinok teyeyekchiuali, tlen tlatekiuili uan molonilistli, uan nojkia tetilis tepostli tlen eltok uan tlen katli kisa pan inon;

8. Tekiaolinistli.

9. Yayauik achiajkatl kalchiualistli;

10. Apoltetikchiualistli tlapepecholi.

11. Nextlitotonkalchiualistli.

12. Teposmimilnenenketlchiualistli, nojkia katli kitekiuia uan tlilmekatl,

13. Pajtlikalchijketl;

14. Kuauitl amatlchiualistli;

15. Chiauak tlachiualistli;

16. Kalchiualtlakualistepostlachiuali;

17. Kalchiual yoltsopelik kalchiualistli;

18. Teposkaltlasalolnenenketlchiualistli;

19. Kaluapalchiualistli.

20. Kalchiualteskatl uan lemetechiualistli.

21. Iatl kalchiualistli.

22. Kaltomin ajoketl uan tlanejketl.

b) Sentika kaltekichiuali:

1. Katli kiamapaleuia mexkotlanauatijketl tlen xitlauak uan katli amo;

2. Kampa onkaaxkayotl sentikatekitlaselili uan sentika kaltekichiuali; uan

3. Katli kichiua sentikatekitl, tlen iaxkamexkotlali uan katli kimelaua axkayotl, pan axoxouili, uan tlen tlatskijtok mexkotlali.

Nojkia axkayotl kichiuasej, tekimachiotlajtoli kema onka kuesoli uan kintlanauia tlen ome uan eyi tlaltokayolmej; sentikatekitl katli moijto mamochiua ka tlaipantili pan se o sekinok tlaltokayolmej; katli kichiuase nochi amatlayakananij tlamachtlanauatijkemej tlen tlajtoua machiotlajtolmen; uan nojkia katli kichiuas chiualtili tekikaltlayakanketl ka tlamachtili uan kenijki kichiuase inin teki, tlamokuitlauili uan tlachpanpa pan ininteki, moneki axkayotl tekichiuanin kipiasej itlapaleuilis tlen tlaltokayolmen, kema kichiua tekipanoli tlen nenechka, tlen tlajtoua machiotlajtoli katli kimelaua.

B. Pan sentikatlanauatili uan tekitlanauatijketl tlen D.F., uan itekipanouanij:

I. Pan se tekitl tonaya uan tlayouatekipanose chikome uan chikueyi kauitl. Tla pano ni kauitl pan se tekitl moixtlauas ompamitl. Yon se tekipanojketl amo uelis tekipanos eyi kauitl momostla uan amo uelis ki expauis pan sempa.

II. Pan se xamano se tonal mosiaketsas tekipanojketl uan kitlastlauise;

III. Tekipanouanijuelis mosiaketsase uan uelis kinmakase sempoauali tonali pan se xiuitl uan amo kintemouilisej.

IV. Tomintlaxtlauali tlen nochi tekipanouanij moneki nochipa eltos pan amatomin tlaxtlauili, uan amo uelis kitemouilise itlaxtlauil kemaj mokalakiya ka yani motlakechisej ipan ijtoli chikuasenpouali uan chiknauitipa ka ni tlanejneuilyotl uan machiotlajtoli.

Amo uelis moechkapanos tomintlaxtlauili tlen nochi tekipanouanij tlen D.F. uan pan nochi tlaltokayolmej.

V. Pan se tekitl itlaxtlauil elis san se, tlen nanamej uan tatamej.

VI. Amo ueliskintlaxtlauise se tekipanojketl, uelis kintomintemouise, kintomin kinkixtilisejuan kinkixtilisej se tlenijki tlatekiuili tlen kijtoua xitlaualistli.

VII. Nochitekipanouanij kinselisej uan tekipanosej tlen katlikiyekoua uan ueli kichiuaj.

Tlaltokayolmej kitlalis kaltlamachtiloyalmejtlen kiamatlayakanas;

VIII. Tekipanouanij kipia xitlaualistli, kinamamajkase uan uelis kitlajkoltise pan iteki tlen katli kiximati, kichiua uan tlen ipejka tekilistli. Sasanse uelis kiselisej pan se tekitl katli kintlamokuitlauia iuikaluaj;

IX. Nochi tekipanouanij uelis kinkixtilise ininteki kema ajkineki kichijki se tlaixpanoli, tlen amo kiipanitak amaxitlaualistli.

Tla se aki kitekikixtilisej uan amo tlaixpanok, uelis sempa kitekimakase, tlan amouajka kitomintlaxtlauase tlen tekpanali tlanauatia. Kema tlamis se tekitl, tejipanouanin katli kintlanauaj kipiasej ixkayotl makimakaka seyok tekilistli san se ipatij uankitomintlaxtlauise tlen tlajtoua machiotlajtoli.

X. Tekipaniuanin kipiasej ixkayotl mosentilisej kampa kinmanauisej inin teki.

Kipiasej ixkayotl kichiuasej tekikauali tlen achtiui kichiuasej tlen tlajtoua machiotlajtoli, tlan se o seyok miyayotl tekichiuali kema kiixpanon ixkayotl katli ni tlaijtoli kijtoua;

XI. Tlamokuitlauili tlanechikoli mochiuas tlen ni kentsi tlatsinkuili tlajtoua:

a) Tlaxtlauas katli mokokojke uan tekitlanauali tlayekolistli; tekitlanauili amo tlayekolistli uan konetlachilistli; tekitlamiltili, amoyok ueli tekipanoua, ueueyotl uan mikilistli.

b) Tlan momokos uan tlan kipia kokolistli, kipias ixkayotl tlen tekitl ken kijtoua machiotlajtoli.

c) Siuamej kemajtlanemiltiaj amo kichiuasej tekitl katli etik uan kitosneki mauililo pan ichikaualis tlen itlanemilkayotl; Kipia mosiajketsas se metstli tlen achitiui kema nexkaya tlakatis ikone uan ome metstli teipa kemaj ya tlakatki ikone, uan kiselis tlen asitok itlaxtlauil uan amo kipolos iteki uan sekinok xitlaualismen katli kipixki ka iteki. Kema tlachiichitia kipias ome tekisiajketsali pan se tonal tlen tlatlajko kauitl tlen sesenka pampa kitlamakas ikone. Uan kiselis pajtilistli, kimakasej pajtli, tlapaleuili ikone uan kampa kikone mokuitlauisej.

d) Iuikaljuan tlen se tekipanojketl kipiasej axkayotl kinpajmakase uan kintlachilisej, tlen tlajtos uan kijtos machiotlajtoli.

e) Motlalis kanke mosiajketsasej uan kampa moyolkuis, uan nojkia kampa motlakouisej kampa temo kentsi ipati tlen nochi tekipanouanin uan iuikaljuan.

f) Kinmakasej inincha tekipanouanin tlen amo tlauel patio, kikoasej uan kampa mokaltlaneuisej tlen eltok achtiui pan amatlanauatili. Uan tlaltokayotl tlen tomin katli temaka, kitlalis se mexko tomin ajokuili tlen kalmen, ka yani kitlalis tomin ka mopaleuisej nochi tekipanouanin uan kitlalis tomintlaneltili uan inoj uelis kitekiuisej uan ka kikoasej amo tlauel patio inincha tlayeyekchiuali, uan nojkia ka kichiuas uan kikualchichiuas, kiyeyekchiuas ka ni tlachtlauili.

Nochi tomin katli asis pan nopa tomin ajokuili moneki nochi kimatisej tekichiuanin tlamokuitlauianin tlen tlajtoua machiotlajtoli uan katli kimelaua, kenijki uan ka tekpanali tlen kenijki mo amatlalis ni tomin ajokuili uan momakas uan moaxkamakasej tomin tlaneltili.

XII. Nochi kuesolmentlen sanse, nechikolmen uannechikolmanauiani moixpantis pan se axkayotl uexkaketsali senkauali uan monechikoltlalis tlen tlajtoua machiotlajtoli.

Nochi kuesoli tlen miyayotl tlakuaualistli tlalotl uan inin tekichiuanin yani mokualchiuas ika ueyi tlaixnamijkemen miyayotl tlakuaualistli axkayotl; tlen panos ika axkayolt tepanitali tlen mexko tlali uan inin tekichikauanin mosenkauas tlen ni iyo tekichiuanin.

XIII. Nochi tsonkotomen, axoxouiltekitinin,analitekipanonin, yekanmiyayolmen tekitinin uan kaltlamokuitlauiani, motekipanosen ika inijuantin ininxitlaualis.

Tlaltokayotl temakas pan nechikoli tsonkotomej tekipanouanin, ajakatepos tekipanouanin uan tlen teposmanauijkemen, nochi tlapaleuili katli moixnextia ipan f) tlen maktlajtli uan se pilijtoli tlen ni nextiltlajkuiloli, ipan tlajtoli ken ni uan ketli tekititos pan tekitlamokuitlauianin tlen nochi kaltekichiuanin; uan.

Nochi tekipanouanin tlakuaualtekamenpan kaltlanauatiyanin len teyoualtlatilankemen, tlaltokayolmen, tlen D.F., uan tlen axkayotl, uelis kinijkuinisen pan ininteki tlan amo kichiuasen tlen tlajtoua machiotlajtoli tlen kema tekititosej pan kaltlanauatili, uan amo uelis sempa kitekitlalisej uan amo uelis kitekimakasej,tlen kejueli mochiuas tlatemoliuan monanauis kema kitekikixtilisej uan, tlan moneki, san uelis ki tomintekitlaxtlauasej.

Tlan kin inkuinisej pan inin teki miyayotl tekichiuanin mochiuas tlen tlajtoua ni pilijtoli, uan katli kijtoua machiotlajtoli.

Tlateyouali kinmakas imaxuan katli tekipanouani tlen yaotlakamej,tepostetikayotl uan tlajpipiyali tepostli,tlapaleuilistli sankej kijtoua ka f) tlatlapantli XI majtlaktipa uan se ka ni tlakuilopamitl, ka sentlamantik tetomitl uan ika yani tlayolkayotl tlanauatijeketl tlen maseual tlamanauilistli ka sejkotilistli tlalnamikyantinij.

XIII-Bis. Tlayakanka kaltominajokuili uan axkayotl tlen tlaltokayolmen miyayotl tlatekiyotl katli tlen nochi tlatskijtokej pan mexko tlayakanka kaltominajokuili tekipanosej tlen tlajtoua inin nextiltlajkuiloli.

XIV. Machiotlajtoli kijtostlake tekiyotlkinmakas tlayakankemen neltekipanouanin.Maesualmen katli kichiuasej ni tekitl kipiasej ixkayotl katli kimokuitlauis inin tomintlaxtlauil uan kipiasej tlamokuitlauili pan pakilis nechikoli.