Diidxa’ Guionna

Diidxa’ Ni Riree Chu De Xti’ Diidxa’ Ii

Xtipa’ Xti’ Ca Xaique Ni Ruzuhua Lu Xtiidxa’ Binni Guidxi

Lu guiropa’ ndaa xtiidxa’ gui’chi’ ro’ bia’ ri’

Ra raca dxiiña’ ne ra cu’ cabe gui’chi’ yachi’ ni gacaladxi cabe gaca diidxa’ bia’

Ndaga 72. Ca diidxa’ yachi’ ni nuu cabe gaca diidxa’ bia’ ne que guiree de ndaani’ ca yoo ra ria’ diidxa’ bia’ ra runi ca xaique ni ruzuhua lu xtiidxa’ guidxi ca dxiiña’ la?, zaca yuu ne cabe ni, ne ziui ne cabe ni diidxa’ ti guya’ cabe pa zanda gacani diidxa’ bia’ o pa co’.

A. Pati diidxa’ yachi’ ni ma ucua yuu ne ca senador ne naaca’ ma nuu ni jneza ti laaca gulee ca ni la?, napani xi tiidi ni lu ná ca diputadu ti guya’ ca’ pa dxandi nuu ni jneza. Ne pa cadi ná tobi de laaca nuu ni jneza la?, zutiidi’ ni lu ná ca xaique ni rucaani lu gui’chi’ bia’ ne pa ca ndi’ naca de que laca nuu ni jneza la?, zucaacani lu gui’chi’ xti’ guidxi ro’, gui’chi’ rucheeche diidxa’ lade binni.

B. Ca gui’chi’ yachi’ ni qué guibigueta’ lu ná’ ca xaique ro’ ni rucaa diidxa’ bia’ lu gui’chi’, bia’ dxi ni maca biete que, ne pa tidi bia’ dxi ma biaana cabe que, que guibiguteni la? ca xaique ro’ ni rucaa diidxa’ bia’ lu gui’chi’ que la? zapa cabe chii guibidxa ti gucaa cabeni ne gacani diidxa’ bia’. Ne ra ma gudi’di’ chii gubidxa ni bite que la? xaique ro’ ra biree diidxa’ que zanababeni iacani lu ca gui’chu’ rizaabi’ lu guidxi, zacani necape que guinaba diidxa’ cabe pa zaa’ pa co’. Pa yoo ro’ ra ria0 ca diidxa’ bia’ gueda gutaagu’ lu xquichi’ ne ma que guni dxiiña’ la? qué zianadxidi’ de gaca ca dxiiña’ ri’ ne pa gueda gacani la? ca xaique ni biaanaga que nga gueda guni cani ne guidxiguetani pa laani qué tidi ni.

C. Guirá diidxa’ yachi’ ni gacaladxi cabe gaca diidxa’ bia’ la?, ca xaique ni rucaa ni lu gui’chi’ ne chineni neza lu binni ca la?, zuluí ná ca’ de guirá’ diidxa’ narenda napani,, (sic DOF 05-02-1917) ne gúdxigueta ni ra bireeni. Ra guibigueta ni ca la?, zaca yuu ne cabe ni xti’ bieque, ne pa jma de galaa de laacabe guini’ de que ma nuu ni jneza la?, zabigueta ni ra nuu ca xaique ni bidxigueta ni que. Ne pa jma de galaa de ca ndi’ naaca ma nuu ni jneza la?, ma zacani diidxa’ ro’ bia’ ne zabi cabe xaique ni rucaani lu gui’chi’ rucheeche diidxa’ ca ucaani, ti ganna binni de que ma biree xti’ diidxa’ bia’.

Ca diidxa’ ni guiete ra caaca yuu ne cabe ti diidxa’ la?, zaca ni chupa chonna si.

D. Pa xiixa diidxa’ yachi’ ni gacaladxi cabe gaca diidxa’ bia’ la?, zabigueta ni ra biree ni, ne gúluiná guirá’ diidxa’ narenda ni bidxeela luni. Ra guibigueta ni ca la?, zaca yuu ne cabe ni xti’ bieque, ne pa jma de galaa de laacabe guini’ de que ma nuu ni jneza la?, zabigueta ni ra nuu ca xaique ni bidxigueta ni que. Ne pa jma de galaa de ca ndi’ naca ma nuu ni jneza la?, ma zabigueta ni lu ná xaique ni rucaa ni lu gui’chi’ que?, ne ma gaca’ ni ná lu ndaa A ni ca lu guía ri’; pa que tiidi’ ni la?, ma que zanda di’ guibigueta ni lu ná ca xaique ri’ xti’ bieque ,ne laca lu iza dxi gucani que.

E. Pa, ti diidxa’ yachi’ ni nuu cabe gaca diidxa’ ro’ bia’, guibigueta ti napa diidxa’ narenda lu ti ndaa o lu guidubini, o pa bi’ni’ chaahui cabe xiixa lu ni la?, ca xaique ni ruzuhua lu xtiidxa’ binni ca zaca yuu neca ca diidxa’ ni cadi ca jneza que?, ne que chi guchaa di’ ca’, ca ndaga ni ma nuu jneza.Pa ca diidxa’ ni bi’ni’ chahui’ ca xaique ri’, guini’ jma de galaa de laacabe naca’ ma nuu ni jneza la?, ma zabigueta ni lu ná xaique ni rucaa ni lu gui’chi’ que ne ma gaca ni casi ná lu ndaa A ni ca lu guía ri’. Pa ca diidxa’ yachi’ ni nuu cabe gaca diidxa’ bia’ ca, que tiidi’ la?, zabigueta ni xti’ bieque lu ná ca xaique ri’ neca laaca, laacabe bi’ni’ cabe ni, ne pa ra guibigueta ni xti’ bieque ca, ná ca xaique ri’ de que caru’ di’ chu’ jneza la?, ma que zadidi’ di ni lu ná xtobi, ne ma zacani casi ná ndagaA ni ca lu guía ri’. Pa yoo ro’ ra ria’ ca diidxa’ bia’ ca, ica tema lu ca xaique ni ruya’ ca diidxa’ ca’ ti ganda gaca diidxa’ bia la?, neca ma gudxi cabe laa de que cadi nuu diidxa’ yachi’ xti’ jneza la?, guidubi naca ni ma que zanda di’ guibigueta ni lu naaca be lu iza que ca, ne zabeeza ni xti’ iza ti ganda tiidi’ ni, paaxa ca xaique ni ruzuhua lu xtiidxa binni guidxi ca’ guidaaguca ne guni’ ca’ ica neca ca diidxa’ ro’ ni nuu jneza ca’ ica lu gui’chi’, ne guiaana ga cani cadi nuu jneza ti ganda uca ne cabe laa xti’ bieque.

F. Ra gusien, guni chaahui xiixa diidxa’ bia’ o guxha’ cabe diidxa’ bia’ o ra cue cabe xti’ diidxa’ bia’ nacubi la?, laca ca dxiiña’ ne ca neeza ri’ gusiene laacabe xi guni cabe.

G. Guirá diidxa’ yachi’ ni gacaladxi cabe gaca diidxa’ bia’ ne que tiidi’ ra guya’ que la?, ma que zanda di gudxigueta cabeni xti’ bieque lu iza que ca.

H. Guirá’ diidxa’ yachi’ ni gacala’dxi’ cabe gaca diidxa’ bia’ la?, zanda guzulu cabe ni ndaani’ intiisi yoo ro’ ra ria’ ca ni, ni que zanda gaca ndaani’ intiisi de ca yoo ri nga, ca dxiiña’ ra riete de bidxichi, o ra cutopa cabe binni ti gaca dxu’, guirá’ dxiiña’ ri la?, niru do’ ra icaa yuu ne cabe ni nga ndaani’ yoo ra runi ca xaique ni ruzuhua lu xtiidxa’ binni guidxi ni rabi cabe diputadu ca dxiiña’.

I. Guirá’ diidxa’ yachi’ ni gacaladxi cabe gaca diidxa’ bia’ la?, zaca yuu ne cabe ndaani’ ti yoo ra ribee cabee xia cabe ti diidxa’ bia’, ne pa tiidi’ ti beu de gudiidi’ ni lu ná ca ni cayua gaca chaahui ni, ne pa ca ndi’ que guini’ ca’ xi modo nuu ni la?, ma zadiidi’ ni lu ná xcaadxi xaique ni ruzuhua lu xtiidxa’ binni guidxi ni nuu ndaani’ xti’ yoo ra ria’ diidxa bia’ que, ne ma icaa yuu ne ca ni.

J. (sic DOF 24-11-1923) Xaique ro’ ni rucaa diidxa’ bia’ lu gui’chi’ ni rireeche lade binni que la?, que zanda di cu’ ruaa lu xiiña’ ca xaique ni ruzuhua lu xtiidxa’ binni guidxi ni ribi cabe casi diputadu ne senador, pa laaca cayuunica’ dxiiña’ de ra ribii cabe xaique guidxi o pa laacabe cabii cabe tu guni dxiiña’ que, ne laca pa yoo ra runi ca diputadu ca dxiiña’ gudxiiba’ ca donda ique tuuxa xaique ro’ xti’ guidxi ro’ ri’ pa bichee lu xiiña’.

Laaca que zanda di guni cabe ni lu xiixa gui’chi’ ra gusenda caacabe tuuxa xaique ne gabi cabe ni laa.