Tiitulo Uhun

Cahan chi cuenda iin iin ñuhun un ndaca ñahan ñuhun Ñucohyo ta cuenda ñuun Ñucohyo cha cuu chi xini ñuun nu iyo cumi tiñu cahnu

Artiiculo 121. Tichi iin iin Ñuhun ndacañahan ñuhun Ñucohyo cua ndundichin ndihi tiñu ta cua cuinu ini ñivi ndihi cha savaha ra cumi tiñu iti nuun ñivi ñuun, ndihi cuhva cha tiin sivi ñivi, ta ndihi cuhva cha tachituni ra cumi tiñu chi ñivi iyo cuati, ta ndihi ca cuhva cha savaha inca cuenda ra ta ra. Ndihi ra satiñu Vehe nu nducuiti ra ta nduinuun ra ta ra ta sacuaha ra ta tisovaha ra ta ra ndihi ley chi chacan cua savaha ra ta ra cha cua quee vaha ndihi tiñu cua savaha ra ta ra, ta ndihi cuhva cha cua tiin sivi ñivi, ta ndihi cuhva cha cua cunu tiñu can, ta cuhva cha cua savaha chi, ta cua cundicu tiñu cuhva cha cati chi ihya:

I. Ndihi ley iyo tichi iin Ñuhun ndacañahan chi tichi cuenda Ñuhun nu iyo ni chi, ta chacan ña cua cuu sacuinu ñivi inca ñuhun chi.

II. Ndihi cha cuu ndatiñu ta ndihi cha cuu vehe a tihyo ñivi, ley cha iyo nu iyo chi cua cati yoso cuhva cua coo chi.

III. Ra tachituni iyo tichi iin Ñuhun ndihi tiñu cua cahan ra cuhva iyo cha cuiti ndicha chi ñivi a cuenda ndatiñu cha iyo chihin ñi ta iyo chi tichi inca Ñuhun, cua cuinu tiñu cuhva cha cahan tiñu cuenda chi, tu cha cuhva can cati ley ndacañahan nu iyo chi.

Ta ndihi tiñu cha cahan cuenda cha iyo cha cuiti chi ñivi cua cuinu cuhva cha cahan chi tichi inca Ñuhun, ta cha maan ñivi ni cutuni tihi ñi chi ñi tichi ñuhun can a iyo ñi nu chi, ta tiin tiñu cahan chi cha cua cutuni ñi cuhva cha tahan chi, ta cana tiñu chihin ñi cha cua cutuni.

IV. Ndihi cuhva cha iyo ñivi ñuun cuhva cha cati ley ñuhun nu iyo ñi, iin ni cuhva ndaa yahvi chi inca tichi ñuhun.

V. Ndihi tutu cha sacuaha vaha ñivi cha chaha ra cumi tiñu tichi iin Ñuhun, cuhva cha cahan ley iyo ican (sic DOF 05-02-1917), cua tayahvi tiñu chihin chi inca tucu Ñuhun.