Titulo xihna cuii

Capitulo 1

Cha cuiti cha iyo chi ñivi cha cua coo vaha ñi ta ñahni cha yuhvi ñi

Artiiculo 29. Tu cha ndaa cha cua casi a cua cuni sandihi cha taxi iyo chi ndihi ñivi a ndaa inca cha ndacu cha la iyo taxi ñivi a cua sacani tahan tiñu chi ñi, ndicha cuii maan ra cuu Xini chi cha cuu chi ñuhun Ñucohyo cua cuu cati ndaa cha cua cuu niniin cahnu ñuhun ya a ndaa iin nu cua cundasi, soco cha cuu Congreso de la Union a ndaa inca ñivi cha cuu tiñu cahnu ca cua cuu cuhva ndatu chi ra tu cha ñavi quivi cha nducuiti ra ta ra cuu chi, ta sa cua ndehe tiñu chi maan tundoho can iin cha quii, ta ndicha cuii cua cuu chi iin tiempu ni, ta cua ndehe ra cha na ñahni cha cua cuhva tundoho a cua casi chi chi ni iin ñivi. Tu cha nu iyo cuiti ñivi cha iyo cuenda Congreso can cua casi tiñu a cua savaha tiñu cha ña vaha, cua cuhva ñi ndatu ta cua nacoo ñi chi tichi ra ra cuu xini cha na ndehe ra tiñu can, soco tu cha tichi tiempu cha quee tatun nuun ñi cuu chi, soco numi xaan cua sacuiti tiñu chi ndihi ñi, ta cua ndehe ñi cuhva cha cu cuu chi.

Tiñu cha cua tachi tiñu ña cua cuu casi tiñu cha ndito ñivi a cha cua tava nda tiñu chi ñivi a cha cua coo tutu ñi a cha cua savaha ñi ndaa cha cuu cha vaha cuenda ñi a cha cua cumi ñi ñivi ñi vehe ñi a cha cua coo sivi ñi a cha cua coo tutu ñi ndaa ñuhun ni cacu ñi, cha cuiti cha iyo chi ve cuati, cha cuiti cha iyo chi ñivi cha cua canihin maan ñi ndaa cua sacahnu ñi, cuhva cha cua savaha ñi ta cua savaha ñi iin cha cuiti cuhva cha cati ra cumi tiñu, a cha na cuinu cuhva cha cha ni cati tiñu iin tuhun chi ñi, cha ña cua cuhva tiñu cha cua cahni tiñu chi ñivi cha indi vecaa, ña cua cuhva tiñu cha cua cuu ñivi musu cuatu a cha cua satiñu cuatu ñi, cha na cua nanducu tiñu chi ñivi cha chanaan a cha sayaha tiñu tundoho chi ñi, ni iin cha cuiti cha iyo chi ñivi.

Cha ña cua cuhva ca tiñu a cha cua casi tiñu cha cuiti cha iyo chi ñivi iyo chi cha cua cuu chi cuhva cha cahan nuun Constitución, ta cua ndehe tiñu tuhun cha iyo, ta cua savaha tiñu cuenda chi iin cha vii cuhva cha tahan chi, ta cua cati tiñu cuhva cha cuu chi ta ña cua tava ndaa tiñu chi.

Ta hora cha cua nuna ndico tiñu cuhva cha ni chasi tiñu cha cuiti cha iyo chi ñivi, vati cha ni queta tiempu cha ni cati tiñu a ñivi cha indi cuenda Congreso cua nuna ndico chi cua cuu chi cuhva cha cahan ley chi cuhva cha ndehe ñivi tiñu can. Ta ña cua cuu cati ra cuu xini cuhva cha ni ndoo tiñu can cuhva cha ni chasi cha cuu Congreso chi.

Ta tiñu cha cua tachi ra cuu xini tichi tiempu cha cua casi tiñu chi a cua casi nuun tiñu, iyo chi cha cua savaha vaha tiñu cuenda chi ta ñivi cha iyo cuenda Suprema Corte de Justicia de la Nación iyo chi cha cua ndehe chi, ta quii xaan iyo chi cha cua savaha ñi cuhva cha cati ley ta cuhva cha cua cunda yahvi chi.