Titulo xihna cuii

Capitulo 1

Cha cuiti cha iyo chi ñivi cha cua coo vaha ñi ta ñahni cha yuhvi ñi

Artiiculo 22.Ñahni ndatu cha cua cahni tiñu chi ñivi iyo cuati, ña cua cahnda ñi, ta ña cua savaha ñi ndavaha ni chi ñivi, ta ni ña cua taan ñi chi seña chi ñi, ta ña cua cani ñi, ni chi yutun, ña cua sayaha ñi ch uhvi ñi chi ni iin ñivi, ta ña cua satiahvi ñi cha yaha cuhva, ta ña cua quihin ñi ndatiñu ñivi, masi ñaan inca cuati savaha ñi ta ña indi chi tichi ihya ta cua nandaa ca chi. Ndihi cuati iyo chi cha cua cutuni ñi cuhva cha cati ley cua cuu chi ta cuhva cha quee vaha chi cua savaha ra Cumi tiñu tachi tuni.

Ña cua cuu chi cha quenda ndatiñu ñivi, ta cha ra cumi tiñu cahan ra ti cua tiahvi ñivi iin multa a xuhun cha ndiseca ñi cuenda ra cumi tiñu, tacan ni ta cha ra cumi tiñu tachi tuni chi ñivi cua cati ra ti cua tiahvi ñivi can, cuenda ñaan cha cumani ñi chi ñivi tahan ñi a ñaan cuati ni savaha ñi. Tacan ni, ña cua cuu chi cha quenda ndatiñu ñi, ta cha ra cumi tiñu tachi tuni chi ñivi cua quenda ndico ra ndatiñu ñivi cha nducuca ta ñahni tiñu savaha ñi, cuhva cha cati artiiculo 109, cua ndoo chi cuenda ñuhun ñuun ñi ndihi cha canihin vaha ra cumi tiñu ta ni ndoo chi cuhva cha cahan tiñu, tacan ni ndihi ndatiñu cha ñahni ca chitoho chi ta ndoo chi cuenda tiñu. Ta cha cuenda ndatiñu cha ñahni ca chitoho chi, cua coo iin cuhva cha cua cundicu tiñu ta cua cundaca ñahan cuenda chi:

I. Ra cumi tiñu tachi tuni chi ñivi cua ndehe tiñu can, ta cua cundaca ñahan maan ra cuenda chi;

II. Ta cua ndehe ra tiñu cuenda cuati cha cuu delicuencia roganizada cha cuu chi cha natahan ñivi ta ndacu ñi cuati a cha chaha ñi iin cuehe chi ñivi, a cha suhu ñi chi ñivi ta satiahvi ñi, a cha suhu ñi camio, a cha cuu trata de personas cha cuu chi cha xico ñi chi ñivi tahan ñi, a cha nducuca xaan ñi ta ña satiñu ñi, ndihi cuhva iyo tiñu cahan chi ihya:

a) Ndihi cha cuu chachi ñivi, a ñaan ndatiñu ñi cha cuu chi cuati, masi ña ta cati ra tachi tuni chi ñivi cha iyo cuati ñivi can, soco ndihi chaha iyo cha cuiti chi ñivi masi savaha ñivi can cuati.

b) Ndihi cha cuu chachi ñivi, a ñaan ndatiñu ñi ta ñahni cuati iyo cuenda chi, soco ni chatiñu ñivi can chi, ta ni tixehe ñi a sacanuun ñi chi chi cha iyo cuati can, ta chacan cua cuu chi cuhva cha cati inciso iti chata.

c) Ta ndihi ndatiñu cha chatiñu ñivi can, ta savaha inca ñivi cuati chihin chi, ta tu ñivi cuu chitoho chi chito ñi cha tacan ta ña ni chaha cuenda ñi chi chi ra cumit iñu a chasi ñi cha na ña cua coto ra cumi tiñu can.

d) Ta ndihi ndatiñu cha iyo sivi inca tucu ñivi chi, soco chito vaha tiñu ti iin cha nihin ñi cha suhu ñi cuu ndatiñu can, a nduinuun ñi chi inca tahan ñi ta savaha ñi chi, ta chacoso cuati ñi nuun ra cumi tiñu ta cahan ñi cuenda ndatiñu can ta maan ñivi cha cuu chitoho chi.

III. Ndihi ñivi cha ni chacoo tundoho can chihin ñi, cuu cua cahan ñi cuenda ndihi ndatiñu ñi ta cua sanahan ñi chi nuun ra cumi tiñu cha nihin vaha ñi ndatiñu cha iyo chihin ñi, ta ñavi cha ña vaha iyo ini ñi cuu cha savaha ñi ndaa cha savaha ñi, ta ña cuu coto ñi cha ña vaha cua savaha ñivi can chi ndatiñu ñi.