Titulo xihna cuii

Capitulo 1

Cha cuiti cha iyo chi ñivi cha cua coo vaha ñi ta ñahni cha yuhvi ñi

Artiiculo 5º. Yoni cua cuu casi ni chi iin ñivi cha cua satiñu ñi cuenda cha sacuaha ñi, a nu satiñu ñi cuenda ñaan cha chinu, a cuenda cha xico ñi a ñaan inca tiñu tahan ini maan ñi savaha ñi, cha cuu cha vaha. Cha nuna cuenda cha satiñu ñivi, ituhun ni ra cumi tiñu tachi tuni chi ñivi cua cuu casi cuenda cha satiñu ñi, tu cha satañu chi chi inca ñivi, a ra ndiso tiñu cua cati cha tacan cua cuu chi cuhva cha cati ley, tu cha chaha chi tundoho chi cha cuiti iyo chi ñivi ñuun. Ni iin ñivi ña cua cuu casi cha ña cua nihin ñivi satiñu yahvi ñi, ituhun ni maan ra cumi tiñu cha tachi tuni chi ñivi cua cuu casi cuenda chi.

Maan ley cua cati cuhva cha ndaca ñahan tichi iin iin Ñuhun, ndaa tiñu cuu cha ndaa ica cha cua coo tutu titulo chi ta cua cuu satiñu ñivi can, ta yoso cuhva cua savaha ñivi can ta cua nihin ñi tutu can, ta ndaa cumi tiñu tahan chi cha cua cuhva tutu can.

Yoni cua sanini chi iin ñivi cha cua satiñu ñi ta ñahni yahvi tiñu cua savaha ñi cua coo cuhva cha tahan chi, ta ña ni ndoo ñi vaha cuhva cha cua tiahvi tiñu chi ñi, ndicha cuii ti tu cha cua cumani ñi ta ra cumi tiñu tachi tuni chi ñivi cua cati ti cua satiñu ñi cuenda cuati ñi, cua savaha ñi tiñu can masi ña tahan ini chi, cuhva cha cati fraccioon I chi II tichi artiiculo 123.

Ta cuenda ndihi ra satiñu cuenda ñivi ñuun, cha nini cuu cha cua satiñu ra ta ra cuhva cha cati ndihi ley cha cahan ihya, cuenda ra cua cuiso tuchii ta cuenda ra cua ndehe tiñu nu cutuni ñivi, tacan ni ra cua cuiso tiñu cuenda vetiñu cha cua cutahan ra chi cumi tiñu, a nacachi ñivi ñuun chi ra cha cua cuu ra cumi tiñu ñuun, ta iin tiso ni ñi chi ra a inca tucu cuhva quihin ra tiñu. Ta cuenda ñivi ndehe nu nacachi tiñu chi ñivi cua cuiso tiñu, ta cuenda cha quihin tiñu sivi ñivi ñuun, cua cuu chi iin tiñu cha nini xaan cua savaha ñi, ta ñahni xuhun cua quihin ñi, soco cua coo yahvi ñivi cha sacuaha vaha ta iyo tiitulo ñi ta ndehe ñi tiñu ñivi ñuun, cuhva cha cati Ley Cahnu ihya ta cuhva cha cahan ndihi ca ley cuenda ihya. Ta ndihi tiñu savaha ra sacuaha vaha cuenda ñivi ñuun cha nini cuu cha cua satiñu ra ta cua coo yahvi ra cuhva cha cati ley a ñaa inca cha cahan chi cuenda tiñu can.

Ra cumi tiñu ndaca ñahan iin Ñuhun ña cuu cua cuhva ra ndatu cha cua tiso vaha ñivi iin tiñu, a ñaa inca cha cua savaha ñi ta cua ndoo ihni chi, a cua naan ihni ndatu cha cuu ñi ñivi iyo nuna cuenda iin cha ñahni yahvi ndaa.

Ta ni ñahni ndatu cha cua tiso vaha ñivi can tiñu cha cua coo cuati ñi a cha cua cuhun ñi inca ñuhun, a cha ña cua cuni ñi savaha ñi tiñu iin tiempu a ndihi ni tiempu tiñu sacuaha ñi, a ñaan ndatiñu savaha ñi a cha cuenda cha xico ñi.

Ta contratu cuenda tiñu cua satiñu ñi sanini chi chihin ñi cha cua satiñu ñi tiempu cuhva cha cati ley, ta ña cua yaha iin cuiya cha ña cua tiahvi tiñu chi ñivi satiñu, ta ña cua cuu nacaa tiempu ta cua saña ñivi can tiñu, a cua naan ihni cha cuiti iyo chihin ñi cuenda ñuun a cha cua cuiso tiñu ñi.

Tu cha yoni sacuinu cuhva cha iyo contratu can, cha cuenda maan ñivi satiñu can, cua sanini tiñu chi ñi cha cuu cuenda ñuun ñi, soco ña cua cuu savaha tiñu cha cua cutuni ñivi can.