Diidxa’ Lá Gayu’

Ca Guidxi Ro’ Liibilisaane Guidxi Ro’ Zaguita (Mexicu) Ne Guidxi Ro’

Ndaga 119. Ca xaique ro’ ni runi dxiiña’ ndaani’ ca yoo ro’ ra ria’ diidxa’ bia’ xti’ guidxi ro’ zaguita (mexicu) la?, napa cabe xi gapa’ cabe ca guidxi ro’ liibilisaane zaguita (mexicu) ti que chu’ xiixa guenda naxoo ndaani’ cani. Ne pa gueda gaca xiixa guenda naxoo ndaani’ ca guidxi ro’ xti’ zaguita (mexicu) ca la?, napa cabe xi guya’ cabe xi zanda gacane cabe caguidxi ro’, huaxa pa guinaaba cabeni nga zacane ca xaique ri laacabe.

Ca guidxi ro’ ni guinaaze’ ca binni ni bi’ni’ xiixa donda la? napa cabe xi gudii cabe ca binni que chixhe gasi ne gudii cabe ni bigaane buque ca xaique ni chi gudxiiba’ donda ique ne gu’ya’ cabe xiru guinaba’ xaique que laacabe. Ca dxiiña’ guidxela xtuuba’ ca donda que la? napa xi chu’ ca xaique ni ruxuba donda ca binni bi’ni’ xiixa donda que, huaxa nirudo’ naquiñe’ gacani casi ná ca diidxa’ ni maca bitaagú’ cabe que. Ti ganda gaca ca dxiiña’ ri’ xneza la? zanda gutaagu ca xaique ruxuba donda que ne ca xaique ca guidxi ro’ ca’ xtiidxa’ca ti gunica’ dxiiña’ guiropaca’.

Pa gacaladxi tuuxa xaique ro’ xti’ xiixa guidxi ro’ xti’ ca gringu ca guseenda caaca xpinnica’ ti guxhuba donda cabe laaca xquidxica la?, napa xi gacani casi nabaqui’ ca diidxa’ xti’ gui’chi’ ro’ bia’ xti’ guidxi ro’ ri’, casi ná ca diidxa’ bia’ ni bidxaagasaa ndaani’ guirá’ caguidxi ro’ ni nuu ndaani’ guidxilayu ri’. Ne pa gueda gaca xiixa de ca dxiiña’ ri la?, ca xaique diidxa’ ro’ bia’ xti’ guidxi ro’ bia’ xti’ guidxi ro’ ri la?, napa cabe chonna late gande dxi ti ganda guseenda cabe ca binni ni caguiba donda ique ca.