Tiitulo Uhun

Cahan chi cuenda iin iin ñuhun un ndaca ñahan ñuhun Ñucohyo ta cuenda ñuun Ñucohyo cha cuu chi xini ñuun nu iyo cumi tiñu cahnu

Artiiculo 119. Ndihi uni cuenda cha ndacañahan ñuhun Ñucohyo iyo chi cha cua cumi chi cuenda iin iin Ñuhun iyo tichi chi, ta cha vachi ñivi inca ñuhun cuni canitahan chihin chi inca ñuhun. Ta cuenda cha cuni cuinda cuati suvi ni maan ñivi ñuun ta sandusaca ñi tichi nu ndacañahan chi, ta ni cuhva cua cumi ra ndacañahan iti xini chihin chi, ta maan ra sacuaha ta tisovaha ley a maan ra cuu xini cuenda Ñuhun can chica ra, tu cha yoni ra sacuaha ley iyo cuiti vehe nu nducuiti ra ta ra.

Ndihi cha cuu iin iin Ñuhun chanini cuu cha ña cua nducuee chi ta cua cuhva cuenda chi chi ñivi cha iyo cuati a cha ni cati tiñu cha cua ndoo ñi vecaa, tacan ni cha cua canihin vaha tiñu chachi ñivi can, a ndatiñu a ñaan inca cha chatiñu ñivi can ta savaha ñi cuati cua cuhva cuenda tiñu chi, chi ra cumitiñu cha cua ndaca chi. Cuhva ya cua savaha tiñu, cha cua ndehe tahan ndihi cha ndehe tiñu cha cutuni ñivi ta savaha tiñu cha cuiti chi ñi, ta iyo chi tichi iin iin ñuhun ta ndu inuun tiñu savaha chi chi tahan chi. Tacan ni cua savaha tiñu cha cua ndu inuun ra cumitiñu tichi iin iin Ñuhun chi ra Fiscalia General cha ndehe tiñu niniin cahnu ñuhun Ñucohyo.

Ta cuenda cha chica ra cumi tiñu inca ñuhun chi ñivi iyo cuati, maan ra cuu Xini Ñuhun Ñucohyo cua ndehe cuhva cha cua cunu tiñu can, ta cua ndehe tahan ra cumi tiñu tachituni chi ñivi cuhva cha cahan Ley Cahnu ya, ta ndihi cuhva cha tisovaha ndihi ra cumi tiñu iyo niniin cahnu ñuñivi tiñu ta ndaa chi cuu chi ley ticuhva chi ñivi. Ta ndihi cuhva cha iyo tiñu can, ra cuu juee cua savaha cha cua cuinu tiñu can, ta cua ndoo ñivi can vehecaa nda cua nda uni xico quivi.