Diidxa’ Guionna

Diidxa’ Lá Guidapa

Xtipa’ Ro’ Xti’ Guidxi Ro’

Ndaga 98. Pa, ti xaique ni ribee xia diidxa’ bia’ gueeda guiadxa jma de ti beu la?, xaique ro’ xti’ guidxi ro’ zaguita (mexicu), zanaababe ca xaique ni ruzuhua lu xtiidxa’ binni guidxi ca pa zudii xtiidxa’ ca’ pa ziu xtobi guni ga xhiiña’ ni biaadxa que ne gacani casi ná ndaga 96 xti’ gui’chi’ ro’ bia’ ri’.

Pa gueda gati’ tobi de ca xaique ni ribee xia diidxa’ bia’ ca o guiiadxa de lu ca dxiiña’ maca tobisi bieque la?, xaique ro’ xti’ guidxi ro’ zaguita (mexicu) ca zabii xti’ xaique ni guni xhiiña’ ni biadxa o ni guti’ que, huaxa ne xtiidxa’ ca xaique ni ruzuhua lu xtiidxa’ binni guidxi nga gacani, ne napa xi gacani casi ná ca diidxa’ ni ca lu ndaga 96 xti’ gui’chi’ ro’ bia’ ri’.

Ca xaique ni runi dxiiña’ ndaani’ ca yoo ra riree xia diidxa’ bia’ pa guinaabaca’ guiree ca’ o gacaladxica’ gusaanaca’ xhiiña’ca’ tobisi bieque la?, jma pa lu ca dxiiña’ ca nuu xiixa guenda naxoo la?, zanda guni cabeni; ne zuseenda cabe ti gui’chi’ ni guini’ de que chi gusaana cabe xhiiña cabe lu ná ca xaique ro’ ni rucaa diidxa’ bia’ ca, ne pa can di icaani la?, ma laaca guseendaca cani ra nuu ca xauque ni ruzuhua lu xtiidxa’ binni guidxi ni rabicabe senador ca, ne ma laaca guini’ ca’ pa zaa guiree cabe o pa co’.

Ca guenda rinaaba guiaadxa ni rinaaba’ ca xaique ni ribee xia diidxa’ bia’ ca la?, que zanda di’ tiidini jma de ti beu, ne ni gudii xtiidxa’ guiiadxa cabe ca nga ca xaiquedo’ ni ribee xia donda ndaani’ guidxi ro’, ne cani guiaadxa jma de ti beu ri la?, xaique ro’ xti’ guidxi ro’ zaguita (mexicu) nga gudiini laacabe, huaxa ne xtiidxa’ ca xaique ni ruzuhua lu xtiidxa’ binni guidxi ni rabi cabe senador. Nin ti guenda riaadxa la?, que zanda di’ tiidi ni jma de chupa iza.