Diidxa’ Guionna

Diidxa’ Lá Guionna

Xtipa’ Xti’ Xaique Ni Rucaa Diidxa’ Bia’

Ndaga 87. Ra gudii xtiidxa’ binni ni chi gaca xaique ro’ xti’ guidxi ro’ zaguita (mexicu) ca xtiidxa’ de que zuni xhiiña’ jneza ne nayaa la?, naquiiñe guini’be ni neza lu ca xaique ni ruzuhua lux tiidxa’ binni guidxi ca sicari’: “zudiee xtiidxa’ gapa’ ne gune guirá’ ni ná gui’chi’ ro’ bia’ ra liibi lizaa guirá’ diidxa’ xti’ guidxi ro’ zaguita (mexicu) ne gune guirá’ ni ná ca diidxa’ ro’ bia’ ni riree lu ni, ne gune ca dxiiña’ xtinne jneza ne nayaa do’ ti binni guidxi ma bidii na xtipa’ ri’, ne zuya’ chu’ guenda nazaca, guenda sicaru, ne guenda nabaani xti’ guidxi ro’ ri’, ne pa que gune ca ni la?, guidxi ro’ ri’ guliidxi naa ne cuaqui ti donda ique”.

Ne pa que ganda che be chigudii xtiidxa’be ra nuu ca xaique ni ruzá’ diidxa’ bia’ o ra nuu ca xaique ni bianagá guni dxiiña’ xti’ ca xaique guidxi que o ra nuu ca xaique ni ruzuhuaa lu xtiidxa’ binni guidxi la?, napabe xi chebe ra nuu ca xaique ro’ xti’ yoo ro’ ni lá Suprema Corte xti’ guidxi ro’ ri’.

Pa que ganda guidxiña’ xaique ro’ xti’ guidxi chi gudii xtiidxa’ ra nuu ca xaique ruzuhuaa lu xtiidxa’ binni guidxi, ra nuu xcaadxi xaique riaana guni dxiiña’, ra nuu ca xaique ni runi xhiiña’ ca ca xaique ni ruzuhuaa lu xtiidxa’ binni guidxi la? napabe si chebe ra nuu ca xaique diidxa’ do’ bia’ xti’ guidxi ro’ ti ganda gunibeni.