Diidxa’ Guionna

Diidxa’ Ni Riree Chu De Xti’ Diidxa’ Ii

Xtipa’ Xti’ Ca Xaique Ni Ruzuhua Lu Xtiidxa’ Binni Guidxi

Lu guidapa ndaa xtiidxa’ gui’chi’ ro’ bia’ ri’

Ca xaique ro’ ni ruzuhua lu xtiidxa’ binni guidxi ne rianaga guni dxiiña’

Ndaga 78. Ra guianadxi ca xaique ni runi dxiiña’ ndaani’ yoo ra ria’ diiddxa’ bia’ ca gunica dxiiña’ la?, ziu xcaadxi xaique ni guya’ gaca ca dxiiña’ ni biaana que, de lu ca xaique ni chi chuu ri la?, napa xi chu’ 37 xaique, de lu ndi la?, 19 ca diputadu ne 18 senador, ti chu’ cabe ndaani’ ca dxiiña’ ri la?, ca xaique ni runi dxiiña’ ndaani’ yoo ra ria’ diidxa’ bia’ ca nga cui tu laa gúni cani ne ra ziluuxe iza nga guiu cabe guidagu lisaa cabe güi cabe diidxa’. Ra chu’ ti xaique ni runi dxiiña’ ndaani’ yoo ra ria’ diidxa’ bia’ la?, zabi cabe xtobi guni xhiiña’be pa guíaadxa be.

Ca dxiiña’ ni chiguini’ ca xaique ni chi chu’ lu ca dxiiña’ ni cayeté ri, ne xcaadxi dxiiña’ ni gudii gui’chi’ ro’ bia’ ri laacabe la?, zuni cabe ca ndi’:

I. Guini’ cabe pa zanda iquiiñe binni guidxi ca dxu’ ni rapa guidxi casi nabaqui nadaa IV xti’ ndaga 76 xti’ gui’chi’ ro’ bia’ ri’;

II. Icaacabe xtiidxa’ xaique ro’ xti’ guidxi ro’ zaguita (mexicu);

III. Cue xia cabe guirá’ ca guenda nagana o guenda naxoo ni naquiiñe guinicabe; icaacabe ca diidxa’ yachi’ ni nuu cabe gaca diidxa’ bia’ ne gutiidi cabe ni ra yoo ra che ni que, ti guiuba guiniibi guirá’ xpieque dxiiña’ ni maca raca que;

IV. Zanda guni cabe o ne xtiidxa’ ca xaique ni ruzuhua lu xtiidxa’ binni ca, xiixa gui’chi’ ni guini’ xi chi guni ca xaique ni runi dxiiña’ ndaani’ yoo ra ria’ diidxa’ bia’ ca, ne pa gacani la?, naquiiñe gudii xtiidxa’ jma de galaa de ca xaique ni nuu gutaagu xtiidxa’ que. Gui’chi’ ri’ guini’ xi guirá dxiiña’ chi gaca;

V. (Diidxa’ bixa).

VI. Paguiadxa xaique ro’ xti’ guidxi ro’ zaguita (mexicu) lu 30 dxi la?, zanda, ti laacabe gudii cabe laa ti gui’chi’, huaxa ra guiaadxa ca la?, naquiiñe cui cabe xtobi chu’ ga guni xhiiña’be laga guibiguetabe;

VII. Gúdii xtiidxa’ cabe de que dxandi xtipa’ ni bidii xaique ro’ xti’ zaguita (mexicu) ca xaique ri la?, jneza cani, casi ca xaique ni guya’ chu’ guidxi jneza ne sin ti guenda naxoo, ca xaique ni rine xtiidxa’ guidxi ro’ xti’ guidxi zitu ni cadi dagu lisaa zaguita (mexicu), ca xaique xti’ ca’ dxu’ ni rapa guidxi ro’,ne ca xaique ni rugaaba’ xpidxichi guidxi,ne huaxa laca naquiiñe gacani casi nabaqui’ diidxa’ ro’ bia’, ne.

VIII. Naquiiñe gunibia’ cabe ca dxiiña’ ni guseenda ca xaique ni ruzaa diidxa’ bia’ ca ra nuu cabe ne laaca naquiiñe cue xia cabe cani.