Yoxebal sjol sbiil

Xcha’tenel

Stulanil Stsobil jtsob jteklum sok stalel te awalil

Xcha’xajt’al

Te Slik’ibal sok Xcholel te Mantaliletik

Bulucheb xchanwinik mantal. Te jachibal be yu’un te mantariletik mak xcha’chapel ta tsaltomba:

I. Te Muk’ul ajwalil ta spamal slumk’inal Mejiko;

II. Te Diputadoetik sok Senadoretik ta smuk’ul nail tsoble;

III. Te chajpane mantaliletik ta jujun estadoetik; sok

IV. Te krisanuetik teme ay ta cero punto trece por siento ta banti nakal komon biilil jich bit’il albil ta mantaliletik.

Teme e mantalil yu’un snail muk’ul tsoblej ja’ya xchajpan te bin pasel yya sk’an ta swenta xchajpel te mantaliletike

Te sk´aalel jujun belta chajbanbil muk’ul tsobleje, te muk´ul ajwalil ta Mejikoe ya me stak’ yak’ cheb belta sk’op ya’ayel te ya xk’atp’oj ta muk’ul mantalile mak cheb belta teme ay nail k’an yak’ix ta na’el teme ay kechel jilem ta nopele. Te jujchajp k’op a’yejetike, yame yich’ lek a’yantayel, yame xch’uunik ta komon teme jich k’ot ta banti snail muk’ul tsobleje, yame stak’ xjalaj ta lajuneb xcha’winik joch k’aaletik. Teme ay maba jich ak’ote, te k’op ya x-och ta mantalile jich bit’il chajpanbil ta pasel, ja’me sbabial ya x-och ta a’ayantayel sok ta ch’uunel ta komon. Teme la yich’ ch’uunele mak la yich’ cha’ jelel sk’oplal yu’unike yame yich’ cha’ ilel sok yananix me xcha’ x-och ta komon a’ayantayel sok ch’uunel jich bit’il albil sk’oplale.

Mame ja’uk toj k’axel ta ilel stukel te jelbil mantalil li’ta muk’ul mantalile.