E catɨ́ɨngˉ e sii ꞌmɨ˜ catɨ́ˋ e siiˋ Ñúˋ

Ja cuǿøngˋ e nilíˋ gaˋ quiáꞌ e júuˆ quiʉꞌˊ ta˜ e féꞌ e fɨˊ ni˜ e jiˋ la

Artículo 136. Jo̱ e jiˋ la lɨ˜ féꞌˋ jaleꞌ júuˆ quiʉꞌˊ ta˜ quiáꞌˉ latøøngˉ guiajmɨ́ˋ, jaˋ niꞌíingˉ bíˋ quiáꞌˉ o̱ꞌguɨ e quiʉꞌˊ ta˜ cajo̱, nañiˉ faꞌ nilɨseaˋ ꞌnɨɨˋ e nijméˉ e jaˋ nilɨti˜ laco̱ꞌ féꞌ. Jo̱ song doñiˊ eeˋ mɨ́ɨꞌ˜ e calɨseáˋ jee˜ fɨɨˋ, jo̱ nilɨseengˋ jaangˋ dseata˜ i̱ nijméˉ ta˜ ó̱ꞌ˜ laco̱ꞌ féꞌˋ e fɨˊ ni˜ ji˜ la, jo̱ dsʉfɨˊ mɨ˜ nilɨseaˊtu̱ fɨˊ quiáꞌˉ dseafɨɨˋ, jo̱baꞌ nilíˋ e niꞌɨ̱́bˉtu̱ íꞌˋ jo̱ e nɨsɨlɨɨˉ jo̱guɨ song calɨseaˋguɨ júuˆ quiʉꞌˊ ta˜ e ꞌmɨɨˉ, jo̱baꞌ ꞌnéˉ e niꞌɨ́ˉ íꞌˋ laco̱ catɨ́ɨngˉ quiáꞌˉ jalengꞌ i̱ cangotáangꞌ˜ e cajméerˋ e lɨ́ɨiñˊ dseata˜ laje̱ˇ e calɨseáˋ e sooˋ dsíiˊ do, jo̱guɨ lajo̱b cajo̱ có̱o̱ꞌ˜ jalengꞌ i̱ cajmɨco̱o̱ꞌ˜ e laco̱ꞌ calɨseáˋ e jo̱.

Lalabˋ féꞌ jaleꞌ Artículos e ñɨɨ˜guɨ e cató̱ˉ

Artículo e Laꞌuii˜. Jo̱ e jiˋ la lɨ˜ féꞌˋ jaleꞌ júuˆ quiʉꞌˊ ta˜ ꞌnéˉ e nilɨñibˊ dsea jo̱guɨ cajo̱ dseángꞌ e niimˉ eáangˊ ꞌnéˉ e nilɨꞌgooˋ jo̱guɨ e nilɨti˜ jaleꞌ e féꞌˋ fɨˊ la fɨˊ latøøngˉ guiajmɨ́ˋ; jo̱ jaˋ quíingꞌ˜ fɨˊ jo̱ jaleꞌ e catɨ́ɨngˉ cuaiiñˇ quiáꞌˉ jial nilɨꞌneaang˜ jalengꞌ dseata˜ seengˋ quiáꞌˉ guiajmɨ́ˋ jo̱guɨ i̱ seengˋ fɨˊ jaleꞌ estados, i̱ canøøngˉ e óoˋ ta˜, jo̱ e la ninǿngˋ e nijméˉ ta˜ ie˜ jmɨɨˉ laꞌuii˜ quiáꞌˉ sɨ̱ꞌˋ mayo e quiáꞌˉ e ji̱i̱ˋ 1917, jo̱ e jmɨɨˉ lab cajo̱ e ꞌnéˉ e nigúeáˋ i̱ Congreso e féꞌˋ e fɨˊ ni˜ jiˋ la, jo̱ nijmér e niféꞌˋ protesta i̱ dseaˋ i̱ nigüeángꞌˋ do ie˜ mɨ˜ nilɨseaˋ elecciones e quiáꞌˉ i̱ˊ i̱ nilíingˉ dseata˜ féngꞌ i̱ nigüeáˋ e lɨ́ɨiñˊ dseata˜ fengꞌ quiáꞌˉ Guiajmɨ́ˋ.

Jo̱ jaleꞌ e elecciones e ꞌnéˉ e nilɨseaˋ do, lɨ́ꞌˆ laco̱ꞌ féꞌ e fɨˊ ni˜ artículo e ngóoˊ quiniˇna, jo̱ jaˋ nijméˉ ta˜ jí̱i̱ꞌ˜ laco̱ꞌ féꞌ e fɨˊ fracción V e féꞌ e fɨˊ ni˜ artículo 82; o̱guɨ faꞌ e jo̱ nijméˉ e jaˋ nilíingˉ diputado o̱si senador, o̱si e jmóorˋ ta˜ lajeˇ lana jee˜ ꞌléeˆ, jo̱ cuǿømˋ e lɨ́ɨˋ lajo̱ lɨ́ꞌˆ song jaˋ lɨ́ɨˊ i̱ quiʉꞌˊ ta˜ e fɨˊ distrito electoral e lɨ˜ catɨ́ɨngˉ do; jo̱guɨ cajo̱ jaˋ lɨ́ɨˊ faꞌ e jaˋ cuǿøngˊ e nilɨꞌíiñˆ ie˜ mɨ˜ nilɨseaˋ elecciones e quiáꞌˉ i̱ nidsitáangꞌ˜ fɨˊ Congreso do e seaˋ fɨˊ Guiajmɨ́ˋ jalengꞌ i̱ lɨ́ɨngˊ Secretarios o̱si nʉ̱́ꞌluu˜ íˋ é, jo̱ cuǿømˋ e lajo̱ song catʉ̱́ˉ i̱ dseaˋ na e lɨ́ɨiñˊ e ta˜ do ie˜ jmɨɨˉ e calɨseáˋ e convocatoria do e quiáꞌˉ e jo̱.

Artículo e Catɨ́ˋ Tú̱ˉ. Jo̱ i̱ dseaˋ i̱ guiing˜ e lɨ́ɨngˊ ta˜ e lɨ́ɨiñˊ dseata˜ fengꞌ quiáꞌˉ latøøngˉ Guiajmɨ́ˋ, jo̱ dsʉfɨˊ mɨ˜ ningɨ́ˋ e nilíˋ publicar e jiˋ la lɨ˜ féꞌ jaleꞌ júuˆ quiʉꞌˊ ta˜ quiáꞌˉ latøøngˉ guiajmɨ́ˋ, jo̱ba nijmérˉ e nitǿrˋ e nilɨseaˋ elecciones e laco̱ꞌ nilɨseengˋ jalengꞌ dseata˜ fɨˋ guiajmɨ́ˋ, jo̱ ꞌnéˉ e nijmita˜ dsíirˊ e laco̱ e Congreso do nijé̱ˉ e nɨseengˋ i̱ dseaˋ sɨꞌíˆ i̱ neaangˊ jo̱ e jaˋ lɨꞌɨɨ˜ eáangˊ, jo̱ nilíˋ lajo̱ e laco̱, mɨ˜ nilɨꞌíˆ jaleꞌ e voto e calɨseáˋ do e˜ calɨꞌneaang˜ i̱ dseata˜ i̱ nigüeáˋ ta˜ do e lɨ́ɨiñˊ dseata˜ fengꞌ, jo̱baꞌ lajo̱b jóng e nijíñꞌˉ i̱˜ i̱ dseaˋ i̱ nilíingˉ do dseata˜ fengꞌ quiáꞌˉ Guiajmɨ́ˋ, jo̱ ꞌnéˉ e nilíˋ lajo̱ e laco̱ꞌ nilɨti˜ jí̱i̱ꞌ˜ laco̱ꞌ féꞌ e fɨˊ ni˜ e artículo e nɨcangǿøngˊnaꞌ.

Artículo e Catɨ́ˋ ꞌNɨˊ. Jo̱ e íꞌˋ e catɨ́ɨngˉ e nilɨꞌíˋ do jí̱i̱ꞌ˜ laco̱ꞌ féꞌ júuˆ quiʉꞌˊ ta˜, jo̱ e jo̱ ninǿngˋ e nilɨꞌíˋ, jo̱ e catɨ́ɨngˉ jalengꞌ Diputados jo̱guɨ jalengꞌ Senadores, e jo̱ lɨ́ɨˊ ie˜ laꞌuii˜ jmɨɨ˜ quiáꞌˉ e sɨ́ꞌˊ septiembre e naˋbɨ jaˋ ngóoˊ eáangˊ e nɨcangǿøngˊ, jo̱guɨ e íꞌˋ e catɨ́ɨngˉ i̱ dseata˜ fengꞌ do quiáꞌˉ latøøngˉ Guiajmɨ́ˋ, jo̱ íˋ catɨ́ɨngˉ e ninǿngˋ ie laꞌuii˜ jmɨɨ˜ quiáꞌˉ sɨ̱ꞌˋ Diciembre ie˜ ji̱i̱ˋ 1916.

Artículo e Catɨ́ˋ Quiʉ̱́ˋ. Jo̱ jalengꞌ Senadores i̱ nigüeángꞌˋ mɨ˜ nilɨseaˋ e elecciones e nɨjaquiéengˊna, jo̱ jaléngꞌ íˋ nica̱rˋ e nilíiñˉ e número e siiˋ par, jo̱ jalengꞌ íˋ jí̱i̱ꞌ˜ tú̱ˉ ji̱i̱bˋ nilɨꞌɨɨiñ˜ e lɨ́ɨiñˊ e ta˜ jo̱, jo̱ nilíˋ lajo̱ e laco̱ꞌ e Cámara quiáꞌˉ Senadores do cuǿøngˋ e nilɨsɨ́ɨngˉ lɨ˜ dséˉguɨ, e condseáꞌˉ laco̱ꞌ táꞌˉ tú̱ˉ ji̱i̱ˋ.

Artículo e Catɨ́ˋ ꞌÑiáˋ. Jo̱ e Congreso jo̱ e seaˋ fɨˊ Guiajmɨ́ˋ do, íbˋ i̱ niꞌnǿngˉ jalengꞌ i̱ nilíingˉ Magistrado i̱ nigüeáˋ e fɨˊ e siiˋ Suprema Corte lɨ˜ ɨ́ɨˋ íꞌˋ quiáꞌˉ latøøngˉ Guiajmɨ́ˋ, e sɨ̱ꞌˋ mayo e niꞌíˋ, jo̱ nilíˋ lajo̱ e laco̱ꞌ jalengꞌ i̱ dseaˋ i̱ teáangꞌ˜ jee˜ i̱ dseaˋ i̱ niingˉ na, nijé̱ˉ e nilɨseaˋ ie˜ laꞌuiiˉ jmɨɨˉ quiáꞌˉ sɨ̱ꞌˋ Junio.

Jo̱ laje̱ˇ e nilɨseaˋ e elecciones na, jaˋ niquiʉ̱́ꞌˉ ta˜ e féꞌˋ e fɨˊ ni˜ e artículo 96 e féꞌˋ cuaiiñˇ quiáꞌˉ jalengꞌ candidato e quiáꞌˉ i̱ nilíingˉ diputado quiáꞌˉ estado, jo̱ dsʉꞌ jalengꞌ i̱ dseaˋ i̱ nilɨꞌneaang˜naꞌ nilíiñˉ lajo̱, jí̱i̱ꞌ˜ quiáꞌˉ laꞌuii˜ e período e tíiˊ tú̱ˉ jí̱ˋ, lɨ́ꞌˆ laco̱ꞌ féꞌˋ e fɨˊ ni˜ e artículo 94 la.

Artículo e Catɨ́ˋ Jñʉʉˉ. Jo̱ e Congreso e sea quiáꞌˉ Guiajmɨ́ˋ nilɨseaˋ co̱o̱ˋ período e ñɨɨ˜guɨ quiáꞌˉ sesiones e ninǿngˋ ie˜ jmɨɨˉ guiꞌñiáˋ quiáꞌˉ e sɨ̱ꞌˋ abril ie˜ ji̱i̱ˋ 1917, jo̱ e laco̱ꞌ nilɨseaˋ e siiˋ colegio electoral, e nijmiꞌíˋ jaleꞌ votos joguɨ cajo̱ i̱ nijíngꞌˉ i̱˜ i̱ dseaˋ i̱ nilíingˉ dseata˜ fengꞌ i̱ nigüeáˋ fɨˊ guiajmɨ́ˋ, e niféꞌrˋ e calɨ́ˉ lajo̱; jo̱guɨ cajo̱ e laco̱ꞌ nijmérˉ e nilɨseaˋ e júuˆ quiʉꞌˊ ta˜ e quiáꞌˉ i̱ siiˋ Tribunales quiáꞌˉ Circuito o̱si quiáꞌˉ Distrito é, jo̱guɨ jaleꞌ e júuˆ quiʉꞌˊ ta˜ e catɨ́ɨngˉ jalengꞌ Tribunales i̱ seengˋ fɨˊ goodseaˋ dsíiˊ guiajmɨ́ˋ jo̱guɨ quiáꞌˉ jaleꞌ e siiˋ Territorios, jo̱ nilí lajo̱ e laco̱ i̱ Suprema Corte i̱ ɨ́ɨˋ íꞌˋ quiáꞌˉ latøøngˉ guiajmɨ́ˋ niꞌnǿiñˉ lajmɨnáˉ jalengꞌ i̱ siiˋ Magistrados quiáꞌˉ Circuito jo̱guɨ jalengꞌ Jueces i̱ quiáꞌˉ Distrito, jo̱guɨ e ñiaꞌˊ e Congreso do e seaˋ fɨˊ Guiajmɨ́ˋ niꞌnǿiñˉ jalengꞌ Magistrados quiáꞌˉ Circuito jo̱guɨ jalengꞌ Jueces i̱ quiáꞌˉ Distrito, jo̱guɨ e Congreso dob cajo̱ e seaˋ fɨˊ Guiajmɨ́ˋ e niꞌnǿngˉ jalengꞌ Magistrados, jo̱guɨ jalengꞌ Jueces i̱ siiˊ quiáꞌˉ Laꞌuii˜ Instancia i̱ seengˋ e fɨˊ Goodseaˋ dsíiˊ Guiajmɨ́ˋ jo̱guɨ e quiáꞌˉ lɨ˜ siiˋ Territorio; jo̱guɨ cajo̱ nijmérˉ jaleꞌ júuˆ quiʉꞌˊ ta˜ e nilɨꞌnéˉ i̱ dseata˜ fengꞌ i̱ guiing˜ guiajmɨ́ˋ. Jo̱ jalengꞌ Magistrado e quiáꞌˉ Circuito jo̱guɨ jalengꞌ Jueces i̱ quiáꞌˉ Distrito, jo̱guɨ jaléngꞌ Magistrados có̱o̱ꞌ˜guɨ jalengꞌ i̱ seengˋ e fɨˊ goodseaˋ dsíiˊ guiajmɨ́ˋ có̱o̱ꞌ˜guɨ jaleꞌ Territorios, jo̱ jalengꞌ íˋ ꞌnéˉ e nidsitáaiñꞌˋ e lɨ́ɨiñˊ ta˜ nʉ̱́ꞌˉguɨ e niguieeˉ e jmɨɨˉ laꞌuii˜ quiáꞌˉ e sɨ̱ꞌˋ Julio quiáꞌˉ e ji̱i̱ˋ 1917, jo̱guɨ e ꞌnéˉ e niꞌuǿngˋ jalengꞌ i̱ nɨcaꞌnǿøngˉ i̱ dseata˜ i̱ guiing˜ lɨ́ɨngˊ dseata˜ fengꞌ quiáꞌˉ latøøngˉ Guiajmɨ́ˋ laje̱ˇ lana.

Artículo e Catɨ́ˋ Guiéˉ. Jo̱ jí̱i̱ꞌ˜ lanaꞌ, e quiáꞌˊ e nilɨꞌíˋ jaleꞌ votos e quiáꞌˉ calɨꞌneaang˜ jalengꞌ Senadores, e jo̱ nijméˉ i̱ siiˋ Junta Computadora i̱ seengˋ e fɨˋ laꞌuii˜ Distrito e quiáꞌˉ jmóoˋ dseaˋ votar e seaˋ fɨˊ laco̱o̱ˋ Estado o̱si e fɨˊ goodseaˋ dsíiˊ guiajmɨ́ˋ, jo̱guɨ nilɨseengˋ e jo̱ e laco̱ꞌ nijméˉ ta˜ e nijmiꞌírˋ jale e votos e cajméeˋ dseaˋ votar quiáꞌˉ diputados, jo̱ e junta do nijíngꞌˉ i̱˜ jalengꞌ i̱ dseaˋ do nilíiñˉ senadores i̱ calɨꞌíingˆ, jo̱ jaléngꞌ íˋ niñíiñˋ jaleꞌ credencial quiáꞌrˉ.

Artículo e Catɨ́ˋ Jñiáˉ. Jo̱ e siiˋ Suprema Corte e ɨ́ɨˋ íꞌˋ quiáꞌˉ latøøngˉ Guiajmɨ́ˋ, íˋbing i̱ niguiꞌˊ júuˆ mɨ˜ seaˋ amparos e ꞌnéˉ e lɨti˜guɨ, jo̱ jaleꞌ e jo̱ ꞌnéˉ e nilíˋ jí̱i̱ꞌ˜ laco̱ꞌ laféꞌ e júuˆ quiʉꞌˊ ta˜ e seaˋ lanaꞌ e nɨꞌɨ́ɨˋ íꞌˋ.

Artículo e Catɨ́ˋ Ñʉ̱́ˉ. I̱ dseaˋ i̱ lɨ́ɨngˊ laꞌuiiˋ i̱ quie̱ˊ nifɨˊ quiáꞌˉ i̱ ꞌléeˉ i̱ siiˋ ꞌLéeˉ Constitucionalista, íbˋ i̱ quie̱ˊ nifɨˊ e lɨ́ɨiñˊ dseata˜ fengꞌ i̱ guiing˜ fɨˊ Guiajmɨ́ˋ, óoˋbre ta˜ e nijmérˉ e júuˆ quiʉꞌˊ ta˜ e catɨ́ɨngˉ e quiáꞌˉ e jmóoˋ dseaˋ votar, jo̱guɨ ꞌnéˉ e nilɨseaˋ e elecciones na laje̱ˇ lana, e laco̱ꞌ cuǿøngˋ e nilɨseengˋ i̱ dseata˜ diputados jo̱guɨ senadores i̱ ꞌneángˉ.

Artículo e Catɨ́ˋ Guíˉ. Jo̱ jalengꞌ i̱ dseaˋ i̱ cagüángꞌˊ e lɨ́ɨiñˊ dseata˜ ie˜ mɨ˜ calɨseáˋ e mɨ́ɨꞌ˜ do, e ꞌníꞌˋ níiñˉ i̱ dseataˋ quiáꞌˉ guiajmɨ́ˋ i̱ calɨꞌneaang˜ e guiʉ̱́ˉ, o̱si e cajmicó̱o̱ꞌrˊ jalengꞌ i̱ cajméeˋ mɨ́ɨꞌ˜ do, jo̱ mɨ˜ cangɨ́ˋ jo̱ catíiñˊ e quie̱rˊ jaleꞌ tʉ̱́ʉ̱ˊ, o̱si e jmɨcó̱o̱ꞌr˜ o̱si lɨ́ɨngˋ e ta˜ jmóorˋ quiáꞌˉ i̱ dseaˋ i̱ cacuingꞌˊ i̱ dseata˜ i̱ siiˋ Constitucionalista do, jo̱baꞌ jalengꞌ íˋ ꞌnéˉ e niꞌɨ́ˉ íꞌˋ quiáꞌrˉ jí̱i̱ꞌ˜ laco̱ꞌ féꞌ fɨˊ ni˜ júuˆ quiʉꞌˊ ta˜ e seaˋ, jo̱ nilíˋ lajo̱ lɨ́ꞌˆ song jaˋ cañɨɨiñˋ jmɨꞌeeˉ quiáꞌˉ i̱ dseaˋ la.

Artículo e Catɨ́ˋ Guicó̱ˋ. Jo̱ lajeˇ jo̱ e Congreso e seaˋ quiáꞌˉ Guiajmɨ́ˋ jo̱guɨ e seaˋ fɨˊ laco̱o̱ˋ Estado, nijmér e nisɨ́iñˉ e laco̱ꞌ niꞌuíingˉ júuˆ quiʉꞌˊ taˋ e cuaiiñˇ quiáꞌˉ guoꞌuǿˆ jo̱guɨ quiáꞌ jalengꞌ dseaˋ jmóoˋ ta˜ fɨˊ fábrica, jo̱ jí̱i̱ꞌ˜ laco̱ꞌ féꞌˊ e lɨ́ɨˊ júuˆ tɨfɨɨˋ jaleꞌ e júuˆ e féꞌˋ e fɨˊni˜ e jiˋ la lɨ˜ féꞌ jaleꞌ júuˆ quiʉꞌˋ ta˜ quiáꞌˉ latøøngˉ guiajmɨ́ˋ e laco̱ niꞌuíingˉ júuˆ quiʉꞌˊ taˋ jaleꞌ e jo̱, jo̱ jaleꞌ e jo̱ ꞌnéˉ e nilɨñiˊ dseaˋ jo̱guɨ e nilɨti˜ fɨˊ latøøngˉ guiajmɨ́ˋ.

Artículo e catɨ́ˋGuitu̱ˊ. Jo̱ jalengꞌ i̱ dseaˋ i̱ cangotáangꞌ˜ jee˜ i̱ ꞌléeˉ i̱ siiˋ Constitucionalista, jo̱baꞌ jalengꞌ jó̱o̱ˊjo̱guɨ jalengꞌ dseamɨ́ˋ quiáꞌˊ i̱ dseaˋ i̱ cajúngˋ jee˜ ꞌniiˋ, o̱si jalengꞌ dseaˋ i̱ cajméeˋ ta˜ uii˜ quiáꞌˉ Revolución o̱si uii˜ quiáꞌˉ e erˊ, jo̱baꞌ jeengˊguɨr nilɨseaˋ fɨˊ quiáꞌrˉ e laco̱ꞌ nilárˉ jmáangꞌ˜ uǿˉ e féꞌ e fɨˊ ni˜ e artículo 27 e féꞌ e fɨˊ ni˜ e jiˋ la, jo̱guɨ cajo̱ catɨ́ɨmˉbre e nijiáangˉ ꞌmóoꞌ˜ lají̱i̱ꞌ˜ e nijíngꞌˉ jaleꞌ júuˆ quiʉꞌˊ ta˜.

Artículo e Catɨ́ˋ Guiꞌnɨˊ. Jo̱ nijé̱bꞌˉ conguiaˊ jaleꞌ e cuuˉ o̱si e jiéꞌguꞌ e carøøngˋ jalengꞌ dseaˋ jmóoˋ ta˜ e cajméerˋ lajo̱ có̱o̱ꞌ˜ jalengꞌ fiir˜, o̱si có̱o̱ꞌ˜ dseaˋ sɨnʉ̱́ʉ̱ˆ quiáꞌrˉ o̱si có̱o̱ꞌ˜ dseaˋ jiéngꞌˋ lɨ́ꞌˆ catɨˊ e jmɨɨˉ lana e féꞌˋ e féꞌ e fɨˊ ni˜ jiˋ la.

Artículo e Catɨ́ˋ Guiꞌquiʉˊ. Jo̱ nɨcajé̱bꞌˉ e siiˋ Secretaría e quiáꞌˉ e ɨ́ɨˋ íꞌˋ.

Artículo e Catɨ́ˋ Guiꞌñiáˋ. Jo̱ niñíingˋ ta˜ i̱ dseaˋ i̱ néeˊ ni˜ e lɨ́ɨiñˊ dseata˜ fengꞌ i̱ guiing˜ guiajmɨ́ˋ, e laco̱ niféꞌrˋ e júuˆ quiʉꞌˊ ta˜ quiáꞌˉ jaleꞌ dseeˉ e lɨseaˋ quiáꞌˉ doñiˊ i̱i̱ˋ dseaˋ i̱e˜ mɨ˜ dsitíingˋ e caꞌléerˊ o̱si e cañǿrˉ i̱i̱ˋ i̱ caꞌléeˊ jo̱ jaˋ cajméerˋ júuˆ, o̱si e jlɨ́ɨiñˉ quiáꞌˉ i̱ dseaˋ i̱ caꞌléeˊ do lají̱i̱ꞌ˜ e laféꞌ fɨˋ ni˜ júuˆ quiʉꞌˊ ta˜ e seaˋ ie˜ sɨ̱ꞌˋ febrero ie˜ ji̱i̱˜ 1913 jo̱guɨ e cajméerˋ gaˋ ꞌuii˜ quiáꞌˉ i̱ dseata˜ i̱ siiˋ Constitucionalista.

Artículo Guijñúuˉ. Jo̱ e Congreso jí̱i̱ꞌ˜ laco̱ꞌ féꞌ e fɨˊ ni˜ jiˋ la, jo̱ laje̱ˇ e seángꞌˋ rúiñꞌˋ e seaˋ sesiónes quiáꞌrˉ, e ninǿngˉ e laꞌuuiˉ jmɨɨˉ quiáꞌˉ e sɨ̱ˋ septiembre quiáꞌˉ e ji̱i̱ˋ la, niguiárˉ e nijmérˉ júuˆ jaleꞌ júuˆ quiʉꞌˊ ta˜….. e féꞌˋ fɨˋ ni˜ jiˋ la, e jaˋ mɨ˜ calɨˊ lajo̱ laje̱ˇ e calɨseáˋ e siiˋ período e cañɨɨ˜guɨ do e féꞌ e fɨˊ ni˜ e artículo 6o. transitorio, jo̱guɨ e nicuǿˉ e guíingˋguɨ laje̱ˇ jaleꞌ e júuˆ e quiʉꞌˊ ta˜ e féꞌˋ cuaiiñˇ quiáꞌˉ e catɨ́ɨngˉ e fɨˊ e seaˋ quiáꞌˉ dseaˋ yaaiñˇ, jo̱guɨ e artículo 30, jo̱guɨ 32, jo̱guɨ 33, jo̱guɨ 35, jo̱guɨ 36, jo̱guɨ 38 có̱o̱ꞌ˜guɨ artículo 107 jo̱guɨ e lɨ˜ cadséngˉ e quiáꞌˉ e artículo 111 e féꞌˋ e fɨˊ ni˜ e jiˋ la, lɨ˜ féꞌ jaleꞌ júuˆ quiʉꞌˊ ta˜ quiáꞌˉ latøøngˉ guiajmɨ́ˋ.

Artículo e Catɨ́ˋ Guiguiéeˋ. Jo̱ jaleꞌ Guáꞌˉ jo̱guɨ jaleꞌguɨ e jiéꞌ, lɨ́ꞌˆ laco̱ꞌ féꞌ e fɨˊ fracción II e fɨˊ artículo Guiéeˉ guiéˉ e féꞌ e fɨˊ ni˜ ji lɨ˜ féꞌ jaleꞌ júuˆ quiʉꞌˊ ta˜ quiáꞌˉ latøøngˉ Guiajmɨ́ˋ, e cangotáangˉguɨ có̱o̱ꞌ˜ e júuˆ e lɨseaˋ la, jo̱guɨ cajo̱ e quiáꞌˉ Guiajmɨ̱́bˋ lɨ́ɨˊ, jo̱guɨ cajo̱ nise̱e̱bˉ jí̱i̱ꞌ˜ laco̱ꞌ júuˆ e røøˊ e féꞌ fɨˉ ni˜ majíˋ lɨ˜ féꞌˋ júuˆ quiʉꞌˊ ta˜ ꞌuii˜ quiáꞌˆ.

Artículo e tíiˋ Guijñiaˊ. Jo̱ nɨcajé̱bꞌˉ jaleꞌ e júuˆ e féꞌˋ fɨˊ la.

Artículo e tíiˋ Guiñʉˊ. Jo̱ nɨcajé̱bꞌˉ jaleꞌ e júuˆ e féꞌˋ fɨˊ la.