Tiitulo Cumi

Cuhva cha tahan chi savaha ra Satiñu cuenda ñivi ñuun a Ñivi satiñu cuenda maan ñi, ta cumani cahvi ñi a savaha ñi cha ña vaha cuenda cha satiñu chi Ndatiñu cha iyo cuenda cha ndaca ñahan Ñuun

Artiiculo 114. Ta cuhva cha cua cutuni ñivi can, cua savaha ra ndiso tiñu ñi cuhva cha ndacañahan tiñu nu satiñu ñi, (juicio político) cua cuu quechaha tiñu can tichi tiempu cha satiñu ñi ta nda cua yaha tichi iin cuiya. Ta cuhva cha tahan chi cha cua tiahvi ñi, cua cuu savaha tiñu chi chihin ñi tichi iin cuiya, soco ña cua yaha quivi cuhva cha quechaha tiñu can.

Ta cha tahan chi cha cua savaha tiñu chi ñivi savaha cuati tichi tiempu cha ndiso tiñu ñi, cha satiñu ñi cuenda ñuun, nda ica chi cha cua savaha ñi cuhva cha cati ley cha tachituni cuati ñivi tichi tiempu cha tahan chi, ña cua yaha uni cuiya. Ta tiempu cha cahan tiñu ihya, (plazo de prescripción) cua cucuiñi chi tu cha ni ndiso tiñu ñivi can cuhva cha cahan artiiculo 111.

Ley cua cati cuhva cha tahan chi cha cua savaha tiñu nu satiñu ñivi, cuhva cha iyo tiñu ta cua savaha a ña cua savaha tiñu cuhva cha cahan fracción III tichi Artiiculo 109. Ta ta cha cua savaha a cua cumani cahvi tiñu cua quenda ndatu chi ñivi cua cumani can ucha cuiya.