Tiitulo Cumi

Cuhva cha tahan chi savaha ra Satiñu cuenda ñivi ñuun a Ñivi satiñu cuenda maan ñi, ta cumani cahvi ñi a savaha ñi cha ña vaha cuenda cha satiñu chi Ndatiñu cha iyo cuenda cha ndaca ñahan Ñuun

Artiiculo 110. Cua cuu cutuni ra ndiso tiñu cua savaha cuenda nu satiñu ra ta ra cha cuu ra Senador a Diputado tichi Congreso de la Union, ra cuu ministru cuenda Suprema Corte de Justicia de la Nacion, ra cuu Consejero de la Judicatura Federal, ra cuu Secretariu cha ndehe nu iyo nu satiñu ra ta ra, ra cuu Diputado cuenda Asamblea Ñuun Ñucohyo, ra cuu Xini cuenda cha ndaca ñahan Ñuun Ñucohyo, ra cuu Fiscal General Ñuhun Ñucohyo, ra cuu Procurador General de Justicia tichi Ñuun Ñucohyo, ra cuu magistrado de Circuito, ndihi ra cuu Juee chi Distrito, ra cuu magistrado chi juee cha tachituni chi Ñivi Ñuun iyo tichi Ñuun Ñucohyo, ndihi ra cuu Consejero de la Judicatura tichi Ñuun Ñucohyo, ra cuu Consejero Presidente chi ndihi ra cuu consejero nu nacachi tiñu chi ra cua cuu cumitiñu, ra cuu secretariu cha tahvi tiñu cuenda Instituto Nacional Electoral, ndihi ra cuu magistrado chi Tribunal Electoral, ndihi ra ndiso tiñu cuhva cha cahan constitución cha satiñu siin maan ra ta ra, ndihi ra cuu xini chi tiñu cha iyo cuenda ra cumitiñu cha iyo siin maan chi, ndihi cha satiñu ta iyo chi cuenda tuvi ñivi ñuun chi ndihi cha iyo cuenda ñuun cha inuun ni satiñu chi, chi fideicomiso cha iyo cuenda ñivi ñuun.

Ndihi ra cuu Gobernador iin iin Ñuhun, ra cuu Diputado tichi iin iin Ñuhun, ra cuu Magistrado de los Tribunales Superiores de Justicia tichi iin iin Ñuhun, tacan ni ndihi ra cuu Consejo de la Judicatura tichi iin iin Ñuhun, tacan ni chi ra iyo ndihi nu satiñu cha cuu cuenda ra ndaca ñahan, cha cuu Constitucion tichi iin iin Ñuhun chi ndihi ley cha iyo tichi Ñuun Ñucohyo chaha chi ndatu chi cha satiñu maan can, ta cua cuu cutuni ra ndiso tiñu can cuenda nu satiñu ra cuhva cha cahan tichi Titulo ihya tu cha cua cuiso cava cahvi ra Constitucion ya, ta chi ndihi ca ley ndaca ñahan chi Ñuhun Ñucohyo iyo tichi chi, tacan ni tu cha ñavaha cua cuatiñu tiñu xuhun cha iyo cuenda Ñucohyo, soco cha cuenda chehe ndicha cuii cua cuhva cachi ra cuenda ta cua quihvi tiñu can nuun ra cuu Diputado tichi iin Ñuhun, vati cua ndehe ra ta ra tiñu yoso cua ndoo chi cuhva cha iyo tiñu.

Ta cha tahan chi cha cua savaha tiñu chi ra ni cumani chi ley can, cua quenda tiñu chihin ra ta ña cua cuu ca cuiso tiñu ra, ta ni ña cua cuu ca satiñu ra ni iin tiñu cha iyo cuenda ñivi ñuun.

Ta cua savaha tiñu cuhva cha cahan ley ya, ra iyo Vehe nu cuu chi cuenda ra Sacuaha ta tisovaha ley can ta ra (Cámara de Diputado) cua tiso ra ta ra cuati can Vehe nu iyo ra cuu Senadoor ta ra,(Cámara de Senadores) ta ndihi racan ta ra cua cahan cha iyo ra ta ra quivi can ta ndehe ra ta ra tiñu Vehe can, soco nda cua yaha cha sacuaha ra ta ra cuhva cha ni quihvi tiñu can nuu ra ta ra, ta cua coo tahan maan ra savaha cuati can quivi can.

Ta tu cha chito ndihi ra cuu Senadoor iyo Vehe nu nducuiti ra ta ra, maan ra ta ra cua tachituni, ta maan ra ta ra cua cati yoso cuu cha tahan chi cha cua cutuni ra savaha cuati can, uni cuenda cuu ra ta ra cha cua nduinuun ra ta ra, ta cua ndehe ra tiñu can, yaha cha cua ndehe ra ndihi tutu cuati ra chacoso cuati can, ta cua coo tahan ra quivi can.

Ndihi cuhva cha cati ra Sacuaha ta tisovaha ley ta ra, (Diputados) ta ndihi tiñu tiso vaha ra cuu Senadoor can ta ra, yoni cua cuu cahan cuati cuhva cha tisovaha ra ta ra tiñun can.