Tiitulo Cumi

Cuhva cha tahan chi savaha ra Satiñu cuenda ñivi ñuun a Ñivi satiñu cuenda maan ñi, ta cumani cahvi ñi a savaha ñi cha ña vaha cuenda cha satiñu chi Ndatiñu cha iyo cuenda cha ndaca ñahan Ñuun

Artiiculo 108. Ta cuenda ndihi cha tahan chi cha cua savaha tiñu cuhva cha cahan tiitulo ya cahan chi cuenda ndihi cha cua savaha ndihi ra satiñu cuenda ñuun, ndihi ra cuu cuenda cha tiso ñivi ñuun, ndihi ra satiñu ta iyo ra cuenda cha cuu ra Cumi tiñu Cahnu cha tachituni chi ñivi tichi ñuhun Ñucohyo, (Poder Jud. Fed.) ta ra Cumi tiñu tachi tuni chi ñivi tichi ñuun Ñucohyo, (Poder Jud. D.F.) ndihi ra satiñu cha cuu ra musu nuu ra cumi tiñu can, ta ndihi ra ndiso tiñu nu cuu chi Vehe Cahnu nu nducuiti ra ndiso tiñu cuenda ñivi ñuun tichi ñuhun Ñucohyo, (Congreso de la Unión) ta ndihi ra satiñu ta cuu ra musu nuu ra ndiso tiñu can a ñaan inca tiñu savaha ra ta ra ican, nu iyo Vehe nu nducuiti ra Sacuaha ta tiso vaha ra ta ra ley cuenda ñuun Ñucohyo, (Asamblea del D.F.) ta ndihi ra ndiso tiñu cha cutahan ra ta ra chi ra cumi tiñu cahnu, a ndiso tiñu ra ta tichi ñuun Ñucohyo, ta ndihi ra quihin tiñu chaha Ley cahnu (Constitución) ta ndaca ñahan maan ra ta ra chi tiñu savaha ra, (Autónomo) ndihi racan ta ra cua ndehe vaha ra ta ra tiñu ndiso ra, ta cua savaha ra chi a ña cua savaha ra cuhva cha tahan chi cha ndiso tiñu ra.

Ta maan ra cuu Xini ndacañahan Ñuhun Ñucohyo, (Presidente Rep. Mex.) tiempu cha cuu ra tiñu cua cuu tiso tiñu cuati ra cha ña ndehe vaha ra tiñu ta savaha xehe ra ñaan cha cua sandoyo ñuhun tiñu cuenda Ñuhun Ñucohyo a ñaan inca cuati cahvi xaan savaha ra cuenda ñivi ñuun.

Ra Ndacañahan iin iin Ñuhun tichi Ñuhun Ñucohyo, ra cuu Diputado cha iyo tichi iin iin Ñuhun, ndihi cha cuu Magistrado Tribunal Superior de Justicia iyo tichi iin iin Ñuhun, a inca ra satiñu cuenda Consejo de la Judicatura cha iyo tichi iin iin Ñuhun, ra satiñu tichi vetiñu cha cuu ayuntamiento, tacan ni chi ndihi ra satiñu maan cuhva cha chaha Constitucion iyo tichi iin iin Ñuhun a cha cuu ley iyo cuenda cha Ndaca ñahan ñuun Ñucohyo chaha chi ndatu cha cua satiñu maan ra ta ra, ta cuenda maan ra ta ra cua cuu chi tu cha cua cuiso cava ra ta ra Constitucion chi ndihi ley ndaca ñahan tichi ñuhun Ñucohyo, tacan ni tu cha ñavaha cua cuatiñu ra ta ra xuhun cha iyo cuenda Ñuhun Ñucohyo.

Ndihi Constitucion iyo tichi iin iin Ñuhun iyo tichi Ñuhun Ñucohyo cua cahan chi iin ni cuhva cha cahan párrafo xihna cuii tichi Artiiculo ya ta ndihi cuhva cha tahan chi cua savaha tiñu, cuhva cha cua satiñu ñivi cha satiñu cuenda ñuun ta iyo ñi satiñu ñi tichi iin Ñuhun a tichi Municipiu. Cuenda maan ñivi satiñu can cua cuu chi tu cha ñavaha cua cuatiñu ñi xuhun cuenda ñuun a cha cua ndoo cha ndiseca siqui ñuun.

Ndihi ra satiñu cuenda ñuun cuhva cha cahan Artiiculo ihya nda ica cha cua cuhun ra ta ra ta cua cuhva ra ta ra tuhun yuhu ra cha cahan ra cha ndicha cuhva cha iyo ndatiñu ra chi inca chachi ra iti nuun ra cumitiñu cha ndehe tiñu can cuhva cha cahan ley.