Tiitulo Uni

Capiitulo II

Seccioon I

Cua nacachi tiñu chi ñivi cua cuiso tiñu ta cua ndoo ñi cua satiñu ñi nu nducuiti iin cahnu ñi

Artiiculo 60. Cuhva cha nduvi nuun ndihi ñivi cuhva cha cahan artiiculo 41 cha ndaa nu constitucioon ya chi cuhva cha cahan ndihi ca ley cuhva cha cuu chi iin cha cuiti cha cua nacachi tiñu chi ñi sacuaha ta tisovaha ley chi ñi cuu senadoor cha iyo iin ñuun a nu cuu chi cha nduvi nuun iin ñuun ta inca ñuun, ta cua cuhva tiñu iin constancia chi ñi cuhva cha ndoo ñi cuu ñi ñivi cha cua nducu tiñu cha tuvi xaan ca savaha votar cuenda ñi ta cua nacachi tiñu chi ñi cua cuu senadoor cuhva cha cua nduvi nuun ñi cuhva cha cahan artiiculo 56 un constitucioon ya ta cuhva cha cahan ley. Ta cua cati ñi cuhva ndicha cuhva cha nachi tiñu chi ñivi cha sacuaha ta tiso vaha ley cuhva cha nduvi nuun tiñu cuhva cha cahan artiiculo 54 cha ndaa un constitucioon chi ley.

Ta cuhva cha ndoo tiñu ta cha cunda yahvi cuhva cha chacoo cha nacachi tiñu chi ra cua cuu tiñu, ta chaha tiñu tutu cha cua cuu ra ta ra, ra sacuaha ta cua tisovaha ra ley a cha cuu ra ta ra senadoor, cua cuu casi tiñu cha ña cua cuu ra ta ra tiñu, nu cuu chi vehe cuenda iin ñuhun nu iyo ra cumi tiñu tachituni(Sala Regional) cuenda cha nacachi tiñu chi ra cuu tiñu, cha iyo chi cuenda ra ndacañahan ta tachituni tichi ñuhun Ñucohyo, cuhva cha cati ley. (Tribunal Electoral Poder Judicial Federeral)

Ta tiñu cua tisovaha vehe iyo cuenda iin ñuhun cuhva cha cahan paarrafo yaha iti chata ihya, maa maan ra cumi tiñu iyo Vehe cahnu ta ndehe ra cuhva cha tachituni tiñu chi ndihi cha iyo tichi ñuhun Ñucohyo, cua ndehe ra tiñu cuhva cha quihvi tutu cha chasi savaha ra cuu xini cuenda cha nducu tiñu ra cua cuu cumi tiñu, ta cua cahan ra cuenda cha ñavaha cha coo voto can, ta cua cuu sama cuhva cha ni chacoo chi. Ta cuhva cha cua cati ra cuu cumi tiñu cahnu iyo vehe cha tachituni cuenda chi cua ndoo tiñu can, ta yoni ca cua cahan yuhu. Ta maa ley cua cati yoso xuhun cua cuniñuhun chi cuenda cha cua coso vaha tiñu can, ta ndihi cuhva cha chica tiñu yoso quichi cuati can ta cuhva cha cua cunu tiñu chi.