Tiitulo Uni

Capiitulo II

Seccioon I

Cua nacachi tiñu chi ñivi cua cuiso tiñu ta cua ndoo ñi cua satiñu ñi nu nducuiti iin cahnu ñi

Artiiculo 55. Cha cua cuu yo diputado chini ñuhun chi ndihi chehe:

I. Cua cuu yo ñivi xuu ñuun Ñucohyo, cha cacu yo ihya, chi ndihi cha cuiti cha tahan chi chihin yo;

II. Tu cha quihvi yo oco iin cuiya yo quivi cha cua tiso tiñu chi ra cua cuiso tiñu;

III. Cua cuu yo ñivi xuu ñuun ñuhun un iyo yo un cua tava tiso tiñu chi ra a ñuhun cha iyo yatin ican un iyo ñi tu cha yaha iñu yoo quivi cha tiso tiñu chi.

Cuu cua sanaan nuun tiñu un ndecu sivi cha nducu tiñu chi iin iin ñivi cha cua cuu candidato cha cua cuu diputado, iyo chi cha cua cuu ñi ñivi cha cacu tichi iin ñuhun Ñucohyo tacan ña cua sanaan nuun tiñu chi ñi un cua tiso tiñu chi ñivi nducu tiñu, a iin ñuun cha iyo yatin ican ta cha iyo iñu yoo cha iyo ñi ican auivi cha ni cumani cha cua savaha tiñu chi.

Ña cua naan ñivi cha iyo yatin chihin ñi cha cua cuhun ñi ta cua cuiso tiñu ñi cuhva cha cua tiso tiñu chihin ñi.

IV. Ña iyo chi cha cua satiñu ñi cuenda sandadu ni cuenda policia a xini cuenda ra cuu policia un cuu chi distrito un cua tiso tiñu chi ra cua cuu tiñu, cha ni cumani cumi xico uchi quivi.

V. Ña cua cuu chi xini nda iin tiñu cha cahancuenda constitucioon cuhva iyo nuna chi ñivi nducu tiñu, ña cua cuu ñi Secretariu ni Subsecretario ñuhun can, ni xini cuenda iin nu nducuiti ñivi ñivi cha natahvi tiñuan ra ndehe cha ndusaca cuenda ñivi ñuun, tu cha cua tiso vaha ra tiñu cha ndacu ra cha ni cumani cumi xico uchi quivi cha cua tiso tiñu chi ra cua cuiso tiñu.

Tu cha ñavi xini cha cuu Suprema Corte de Justicia de la Nación, ta ni Magistrado, ta ni Secretario del Tribunal Electoral del Poder Judicial de la Federación, ta ni ra chaha cha chini tuni chi ra Presis-dente a ra chaha cha chini tuni cuenda electoral a ra chaha cha chini tuni chi ndihi ni tiñu, a ituhun ni nu cua ndehe ñi tiñu a un cuu chi cuenda Instituto Nacional Electoral, ta ni Secretario Ejecutivo a Director Ejecutivo a ndaa inca tiñu cha ndiso ñi, soco tu cha iyo uni cuiya cha cha quee ñi a saña ñi tiñu can.

Ndihi ra cuu Gobernador ndihi ñuhun ta ra cuu Xini chi ra Cumi tiñu ñuhun Ñucohyo ña cua cuu quihvi ra cuenda cuhva cha cati ley tichi tiempu cha nciso tiñu ra ta ra ican, masi cha quee ra ta ra chi tiñu cha savaha ra.

Ra cuu Secretariu cuenda ra Cumi tiñu cha iyo ñuhun Ñucohyo, chi ndihi ra Cuu xini chi chi Cumi tiñu cha tachi tuni cuenda ñuhun Ñucohyo ta ndihi ñuhun cha iyo tichi chi, savaha ta cua maa ra cuu Cumi tiñu iin iin ñuun ta nda inca tiñu cha ndiso tiñu ra ta ra cha cuenda politico ta ndehe ra ta ra tiñu Ñucohyo, ña cua cuu quihvi ra ta ra cuhva cha cha cati leyy, tu cha ña cua nacoo ra ta ra tiñu cha ndacu ra tichi cumi xico quivi cha ni cumani tiso tiñu chi ra cua cuiso tiñu;

VI. Tu cha ñavi xini cuu yo cuenda veñuhun, ta

VII. Ta ñahni ni iin tundoho chi iqui cuñu yo cuhva cha sanahan artiiculo 59.