U ALMEJEN NOJ A’ALMAJT’AANIL U MÚUCH’ PÉETLU’UMILO’OB MÉXICO
Noj a’almajt’aan ts’áaba’an ojéeltbil tu Jala’ach Tsaalajil Nojlu’um tu 5 k’iinil u winalil febreero tu ja’abil 1917
U ts’ook jelbesajil ts’a’aba’an k’ajóoltbil DOF 27-05-2015
Óoxjo’olts’íib
Péets’el III
Tu Yóok’olal U Nojbéeytalil Noj Jala’ach
U 82 Jatsts’íibil. Uti’al u meenta’al Noj jala’ache’ k’a’ana’an:
I. Bey lu’umkabil sijnáal tu lu’umil Méxicoe’, yaan tuláakal u páajtalilo’ob, u yaal ti’ yuum wáaj na’ Mexicoil yéetel ts’o’ok u kajtal ich nojlu’um u jach p’íitile’ 20 up’éelal ja’ab.
II. Ka yanak 35 up’éelal u ja’abil chuka’an tak tu k’iinil le yéeybalo’.
III. Ka kajlak ich nojlu’um tuláakal le ja’ab ma’ili’ k’uchuk u k’iinil le yéeybalo’.
U jóok’ol ti’ nojlu’um tak 30 up’éel k’iine’, ma’ táan u ch’e’ensik u xo’okol kajnáalil.
IV. Ma’ u yantal ich k'ujnajil jo’olpóopil mix u meyajtik Ajk'iin ti’ jump’éel k’ujtalil.
V. Ma’ u meyaj ti’ K’atunil, wa ti’ ku meyaje’, wakp’éel winal ma’ili’ k’uchuk u k’iinil le yéeybalo’.
VI. Ma’ u meyaj je’ex u Nojoch Jo'olpóopil México wáaj u Ka’anojoch Jo'olpóopil México, U Noj Xak'alkaxannáalil Nojlu'um, U Noj Jala'achil ti’ jump’éel Péetlu'umil mix u jo’olil ti’ u Jala’achil Distrito Federal, chéen wáaj ku p’atik u kuuch 6 up’éelel winal ma’ili’ k’uchuk u k’iinil le yéeybalo’; yéetel.
VII. Bey mina’an le ba’alo’ob ku luk’siko’ob béeytalilo’ob jets’a’an ti’ jatsts’íib 83o’.