Diidxa’ Lá Gadxe

Ni Zanda Guirugulú

Ndaga 131. Guidxi ro’ zaguita (mexicu) si nga zanda uca xiixa xti’ cue cani chi guidoo ndaani luguiaa ro’ xti’ ca gringu o cani chi tiidi ndaani guidxi ro’ ri’, ne laca cue xiixa diidxa’ bia’ ni ucaa riidxi ca binni ni cadi cayuni ni ná ca xtiidxa’ ni, ne laca zanda ucuezadxini xiixa ni canaguidoo neca de ra tiisi zeeda cani; neca ca xaique ro’ xti’ guidxi ro’ ri’ cue xiixa diidxa’ bia ni guzete ni ca lu ca ndaa VI ne VII xti’ ndaga 117 xti’ gui’chi’ ro’ bia’ ri’.

Ca xaique ni ruzuhua lu xtiidxa’ binni guidxi ne runi dxiiña’ ndaani yoo ro’ ra ria’ diidxa’ bia’ ca la?, zudii xtiidxa’ cabe xaique ro’ xti’ guidxi ro’ zaguita (mexicu) ri’, ti ganda uquixe o guindete lu cani riaxa ti ganda guiu xti’ guidxi ro’ xti’ gringu gutoo xti’ ndaani luguia ro’ xtini ne zaqueca cani chi guidoo xtini ndaani xquidxi ca gringu ti ganda cha xcadxi nacubi; ne laaca zaqueca pa guiuba ga si caquiiñe cabe guchugu cabe lu ca cuana ni chi guidoo ndaani ca luguiaa ro’ xtini ne cani chi guidoo xtini ndaani xti’ luguia ro’ xti’ xti’ guidxi ro’, ti zaca guirooba xpidxichi guidxi o pa gacaladxi cabe guni cabe xiixa ni ganda gacane guidxi ro’ guirooba’. Ne ra guseenda xaique ro’ xti’ guidxi ro’ zaguita (mexicu) gui’chi’ ra ica pabia’ bidxichi caquiiñe la?, napa xi gunini cada iza, ne ra nuu ca xaique ni runi dxiiña’ ndaani yoo ro’ ra ria’ diidxa’ bia’ ca nga cheni ti ma guini’ ique neca pa zaree bidxichi canaababe que o pa co’.