Tiitulo Ucha

Cha cahan na cua tiso tiñu cuenda ndihi chi

Artiiculo 131. Cuenda maan ra ndacañahan Ñuhun Ñucohyo cuu chi cha cua tiso ra cuhva cha cua tiahvi tiñu cuenda ndihi ndatiñu cha sata a xico tiñu inca ñuhun, a cha yaha chi tichi ñuhun Ñucohyo, ta chacan ndihi ni tiempu cua tiso ra cuhva cha cua coo tiñu a cha cua casi tiñu cuenda chi, cuenda cha sacuenda tiñu ñuhun a cha cuenda ñivi cumi tichi ñuun, ti ña cua caca ndihi ndatiñu can tichi ñuhun Ñucohyo, ta ñahni tuhun ndaa iti quichi chi; soco maan ra ndacañahan ñuhun Ñucohyo, ña cua cuu tiso ra tiñu tichi ñuun Ñucohyo cha cua tiahvi ñivi xuhun tiñu , ta ndihi ley cha cahan tichi fraccioon VI ta VII tichi artiiculo 117.

Maan ñivi sacuaha ta tisovaha ley Vehe nu nducuiti ñi, cua cuhva ndatu chi maan ra cuu Xini ndacañahan Ñuhun Ñucohyo, vati cua sandaa ra yahvi, a cua sanuun ra chi, a cua casi cuii ra ndihi cuhva cha tiahvi tiñu tarifa cha xico ta sata ndatiñu, cha cua savaha ra satiñu ta tisovaha ley, ta cua tiso raa ta ra inca chi; tacan ni cha ña cua cuhva vaha ndatu, a cua casi tiñu cha sata a cha xico ndatiñu inca ñuhun, a cha yaha ndihi nuun chi, ta nini xaan cha cua savaha tiñu tacan, vati cuhva can cua cua nduinuun cuhva cha sata tiñu chi inca ñuhun, ta cuenda cha satiñu xuhun tichi ñuhun Ñucohyo, ta cuhva can ña cua cuhva chi tundoho cuenda ndihi ndatiñu chinu tichi ñuhun Ñucohyo, a cua savaha tiñu inca cuhva cha cua cuu chi iin cha vaha chi ñuhun ñuun Ñucohyo. Ta maan ra cuu Xini ndacañahan tacha cua tachi ra tutu cuenda cha cua cuatiñu xuhun cuenda tiñu iin iin cuiya, chi ra sacuaha ta tisovaha ley vehe nu nducuiti ra ta ra, vati cua ndehe ra ta ra a vaha chinu chi cuhva cha ni chaha ra ta ra ndatu chi ra.