Yoxebal sjol sbiil

Xcha’tenel

Stulanil Stsobil jtsob jteklum sok stalel te awalil

Yox xajt’al

Te swentail snail yu’un muk’ul tsoblej

Jo’lajuneb xchanwinik mantal. Ta Snail muk’ul tsoblej yu’un Jchap mantariletik, te k’alal ya sk’ases te stojol ta lok’esel, ma stak’ yiktay ta ilel ta xcha’ajtael te chiknajem at’elil yu’un te mantalil; sok teme ay jich biluk nax yu’un yantik sjoylejal ta ijkitael te bitil albil ta xcholel ta ajtael, ya sna stojol te ak’bil ta ilel te ayuk albil yu’un jilem stsajtael stojol mak ta mantalil chiknajem yu’un a’tel.

Jich te bit’il ay ya’yejale, te yalel sk’oplale yame sk’an ya yich ta muk’ te bin albil ta jukeb sjukwinik mantal yu’un te Muk’ul mantalil june sok te bitik yantik smantalil ya smeltsan te Stsoblej Jtek’lejetike.

Te Muk’ul Jtuneletik ta spamal slum sk’inal Mejiko, Jmantalteswanejetik, Jtunel j-a’tel, sok Jchapanwanej, ja’nix jich te Snail a’telil te yich’oj sba ta muk’ stukelik te bit’il albil sk’oplal yu’un te Muk’ul mantalil june te ya slajesik te Tak’in Chajpbil sk’oplal ya yich’ pikel tunesele yu’un te J-a’tel jtunel ta spamal slum sk’inal Mejikoe, yame stsakik te bin yipal ya xtun yu’unike, ta jujchajpme ya yich’ cholel lek sk’oplal bin yipal stojol ya yich’ik te j-a’tel jtuneletike. Jich te bin yipal tsakal ta sjunile yame sk’an ya yich’ pasel te bin chajpbil sk’oplal ya yich’ ak’el te tak’in chajpbil sk’oplal ta túnesele, jich bit’il ya yal ta chanlajuneb xcha’winik mantal ta xcha’xajt’al yu’un te Muk’ul mantal june sok smantal meltsanlabil ta swenta te sk’op ya’yejale.