Tiitulo Uni

Capiitulo II

Seccioon I

Cua nacachi tiñu chi ñivi cua cuiso tiñu ta cua ndoo ñi cua satiñu ñi nu nducuiti iin cahnu ñi

Artiiculo 63. Vehe nu nducuiti ra sacuaha ta tisovaha ley ña cua cuu nuna cuhva cha cua satiñu ra ta ra ican tu cha ña ndihi ra ta ra iyo, iin iin vehe can, ta tu cha ña yaha sava ndihi ra ta ra iyo cha cuu ra ta ra tiñu ican, soco ndihi ra ta ra cha iyo ra ican nda ica cha cua nducuiti ra ta ra quivi cha tahan chi cuhva cha cati ley tacan cua sanini tahan ra ña chahan can ta ra, ta cua cuhun ra tichi nu cua cunu oco uchi quivi, ti tu cha ña cua cuhun ra ta ra cua cutuni ini tiñu ti ña cuni ra ta ra ndehe ra tiñu ndiso ra, ta cua cana tiñu chi ra cutahan ta nda ica cha cua cuhun ra ta ra tichi quivi cuhva cha iyo tiñu, ta tu cha ni racan ta ra ña cuni cuhun, cua ndoo nuna nu chacunda ra cha ndehe ra ta ra tiñu. Ta ndihi ra ña chahan cha cuu ra ra sacuaha ta tisovaha ley ta ndihi ra cuu senadoor vehe nu nducuiti ra ta ra, cha cua quechaha ndehe ra tiñu ley can, ta ndihi chaha cha ña cua cuhun ra ta ra tichi tiempu cha cua coo tiñu ican cua ndoo tiñu ti: ndihi ra ña chahan can cha cuu ra ra sacuaha ta tisovaha ley a ra cuu senadoor cha nducuiti ra ta ra vehe nu satiñu ra ta ra, cua ndehe tiñu ti cua sama ra ta ra, ta ndihi ca ra ta ra cha cuu ra ñivi tuvi ta satiñu ra ican, cua ndehe ra ta ra ti cua nacachi chaa tiñu chi ra cua cuiso tiñu cuhva cha cati fraccioon IV tichi artiiculo 77 nu Ley Cahnu ya, ta tiñu ndiso ra sacuaha ta tisovaha ley cha tiso tiñu chihin ra cuenda voto iin cahnu ni, maan cuenda partido ra cua cati ndaa ra tahan chi cha iyo sivi ra nuu lista cuhva cha tahan chi cha cua quihin ra tiñu cuenda ñuhun nu nducu tiñu chihin ra, ta cha ni yaha quihin ra ta ra tiñu savaha ndihi ra cuu diputado cuhva cha tahan chi chihin ra; ta tiñu ndiso ndihi ra cuu senadoor cha tiso tiñu chihin ra cuenda voto iin cahnu ni, maan cuenda partido ra cua cati ndaa ra tahan chi cha iyo sivi ra nuu lista, cuhva cha tahan chi cha cua quihin ra tiñu nu tahan chi chi ra tichi ñuhun Ñucohyo cuhva cha nducu tiñu chihin ra; ta cha ni yaha quihin ra ta ra tiñu savaha ndihi ra cuu senadoor can ta ra, cuhva cha tahan chi chihin ra ta ra; ta tiñu ndiso ndihi ra cuu senadoor cha nacachi tiñu chihin ra ta ra cha ña cuaha voto nihin ra cha xihna cuii, maan cuenda partido ra cua cati ndaa ñuhun cuu chi cha tahan chi cha ni quihvi sivi ra cha nducu ra ta ra tiñu ta ndoo sivi ra cha uvi nuu lista.

Ta ndihi ra sacuaha ta tisovaha ley ta ndihi ra cuu senadoor, tu cha indaha ni cua cumani ra uchi quivi, ta ña sacoto ra a ña ni chica ra ndatu chi ra cuu xini iin iin vehe nu satiñu ra ta ra, cha na coto ra ta ra ñaa cuenda cha cumani ra, ta cua saña ra ta ra cha chahan ra nda quivi cha cua quechaha satiñu ra ta ra ican, cua cana tiñu chi ra cutahan ta ra.

Tu cha ña ndihi ra ta ra queta cuhva cha iyo tiñu cha cua coo ndihi ra, ta cua ndehe ra ta ra tiñu cuhva cha tahan chi cha cua quechaha satiñu ra ta ra, numi xaan cua cana tiñu chi ra cutahan ti cua cuhun ra ta ra ti cua ndehe ra ta ra tiñu cuhva cha tahan chi, tichi cha chinu oco uchi quivi cuhva cha cahan tiñu ihya.

Tu cha ña vaha cua savaha ñi cua ndoo chi cuenda maa ñi ta cua cutuni cuhva cha cahan ley, masi cha nacachi tiñu chi ñi cha cua cuu ñi ñivi sacuaha ta tisovaha ley a senadoor cuu ñi ta ña cua cuhun ñi ta cua sanahan ñi cha ndicha vehe cha nducuiti ñi ta cua ndotiñu tiempu cha tahan chi cuhva cha cahan nu quechaha artiiculoya. Ley cua cati cuhva cha cua cutuni ñi nducu tiñu cuhva cha ndaca ra tisovaha ley chi cuu senadoor ta ra cuhva cha ndoo vaha ñivi cha indi tichi cha nacachi tiñu ta ña cua queta ñi cha cua satiñu ñi cuhva cha tahan chi.